በክልሉ በመኸር እርሻ እስካሁን 1 ሚሊዮን 632 ሺህ ሄክታር ማሳ በተለያዩ የሰብል አይነቶች ለምቷል

🔇Unmute

አሶሳ፤ ነሐሴ 21/2018 (ኢዜአ)፡- በቤኒሻንጉል ጉሙዝ ክልል በመኸር እርሻ እስካሁን 1 ሚሊዮን 632 ሺህ ሄክታር ማሳ በተለያዩ የሰብል አይነቶች መልማቱን የክልሉ ግብርና ቢሮ አስታወቀ።

በተለይም እስካሁን ከለማው መሬት 231 ሺህ 902 ሄክታሩ በቅባት እህሎች የተሸፈነ መሆኑ ተመላክቷል።

በክልሉ ግብርና ቢሮ የሰብል ልማትና ጥበቃ ቴክኖሎጂ ማስፋፊያ ዳይሬክተር ፍቅሩ አቡን ለኢዜአ እንደገለጹት፤ በክልሉ በመኸር ወቅቱ 1 ነጥብ 8 ሚሊየን ሄክታር መሬት በተለያዩ የሰብል አይነቶች ለማልማት ታቅዶ ተግባራዊ እየተደረገ ነው።

እስካአሁን በተካሄደ የእርሻ ስራ 1 ሚሊየን 632 ሺህ ሄክታር ማሳ በተለያዩ የሰብል አይነቶች መልማቱን ተናግረዋል።

ከለማው ማሳ ውስጥም 231 ሺህ 902 ሄክታሩ በሰሊጥ፣ አኩሪ አተር እንዲሁም ለውዝ በመሳሰሉ የቅባት እህሎች የተሸፈነ መሆኑን ለአብነት ጠቅሰዋል።

አርሶ አደሮች በክልሉ ከሚገኘው የዘይት ፋብሪካ ጋር የገበያ ትስስር በመፈጠሩ የቅባት እህሎችን በስፋት በማምረት ተጠቃሚ መሆናቸውን ተናግረዋል።

በክልሉ የቅባት እህሎችን ምርታማነትን ለማሳደግ የተሻሻሉ ዝርያዎችን በመጠቀም እንዲሁም ለአርሶ አደሩ ተገቢውን ግንዛቤ በመፍጠር ምርትና ምርታማነትን ለማሳደግ እየተሰራ ነው ብለዋል።

በክልሉ ለቅባት እህሎች ተስማሚ የሚሆነውን የአካባቢ ስነምህዳር የመለየት ስራ እየተከናወነ መሆኑን ጠቅሰው፤ ከአርሶ አደሩ በተጨማሪ በእርሻ ኢንቨስትመንት የተሰማሩ ባለሃብቶች በሰፋፊ የእርሻ ማሳ ላይ የቅባት እህሎችን በማምረት ለገበያ እያቀረቡ መሆናቸውን አስታውቀዋል።