የኢትዮጵያን የልማት ጉዞ ለማደናቀፍ የሚሞከሩ ውጫዊ ጫናዎች የሕዝቡን አንድነት ይበልጥ ያጠናክራሉ

🔇Unmute

አዲስ አበባ፣ ጥቅምት 29/2019 (ኢዜአ)፡-የኢትዮጵያን በውሃ ሀብቶቿን የማልማት ተግባር ለማደናቀፍ የሚሞከሩ ውጫዊ ጫናዎችና የተዛቡ ትርክቶች የኢትዮጵያን ሕዝብ አንድነት የሚሸረሽሩ ሳይሆን ይበልጥ አጠናክሮ በጋራ እንዲቆም የሚያደርጉ መሆናቸውን የውኃና ኢነርጂ ሚኒስትር ኢንጂነር ሀብታሙ ኢተፋ (ዶ/ር) ገለጹ።

ኢትዮጵያ የምታካሂደው የልማት ሥራ ለቀጣናው ሀገራት ጭምር ጠቃሚ እንጂ ማንም ላይ የሚደርስ ጉዳት እንደሌለውም አመልክተዋል።

ኢንጂነር ሀብታሙ ኢተፋ (ዶ/ር) ከኢዜአ ጋር ባደረጉት ቆይታ እንደገለጹት፤ የኢትዮጵያን የውሃ ሀብት አጠቃቀምን በተመለከተ ከታሪክ አኳያ የሚነሱ የተሳሳቱ መረጃዎችና ትርክቶች እውነታውን የማያሳዩ ናቸው።

በኢትዮጵያ ወንዞችና የውኃ ሀብት ልማት ላይ የሚደረጉ የተሳሳቱ ስሌቶችና ስጋቶች ተገቢ እንዳልሆኑ ጠቁመዋል።

የኢትዮጵያ ዓላማ ሁልጊዜም የጋራ ጥቅምን ማዕከል ያደረገ እንጂ ሌሎችን የሚጎዳ እንዳልሆነ አስታውቀዋል።

ይሁን እንጂ የውጭ አካላት ኢትዮጵያ ውኃውን መጠቀም ከጀመረች እኛ እንጎዳለን ከሚል የተሳሳተ ስሌት በመነሳት የታላቁ የኢትዮጵያ ህዳሴ ግድብ ፕሮጀክት እንዳይሳካ የተለያዩ መሰናክሎችን ሲፈጥሩ እንደቆዩ አስታውሰዋል።

ሆኖም በችግር ውስጥ አልፈውም የኢትዮጵያ ሕዝብና መንግስት በጋራ በመቆም ታላቁን የኢትዮጵያ ሕዳሴ ግድብን ጨምሮ በርካታ የልማት ሥራዎችን እውን ማድረግ መቻላቸውን ሚኒስትሩ ገልጸዋል።

ኢትዮጵያ የውሃ ሀብቶቿን ለማልማት የምታደርጋቸውን ጥረቶች ለማስተጓጎል የሚደረጉ ውጫዊ ግፊቶችና የተሳሳቱ የሚዲያ ዘመቻዎች የኢትዮጵያውያንን የአንድነት መንፈስ የሚፈትኑ ሳይሆን፣ ይበልጥ አጠናክረው በጋራ እንዲቆሙ የሚያደርጉ መሆናቸውንም አመልክተዋል።

ኢትዮጵያ የውኃ ሀብቷን በፍትሃዊነትና በዘላቂነት ለሕዝቧ ልማት ለመጠቀም የምታደርገውን ጥረት አጠናክራ እንደምትቀጥልም ሚኒስትሩ አፅንኦት ሰጥቷል።

ኢትዮጵያ በታላቁ የሕዳሴ ግድብና በተለያዩ የልማት መስኮች እያከናወነቻቸው ያሉ የልማት ሥራዎች ግብፅን ጨምሮ ለቀጣናው ሀገራት ጠቃሚ እንጂ ሥጋት እንዳልሆኑ ሚኒስትሩ አስታውቀዋል።

በአሁኑ ወቅት የምንሰራው የልማት ሥራ ለኢትዮጵያም ለግብፅም ጭምር የሚጠቅም በመሆኑ ምንም ዓይነት ሥጋት ሊገባቸው አይገባም ሲሉ አስታውቀዋል።

የሀገራችንን የልማት እንቅስቃሴዎች ለማደናቀፍ የሚደረጉ ውይይቶች እና ፕሮፓጋንዳዎች ቢኖሩም፣ የኢትዮጵያ ትኩረት ሁልጊዜም በጋራ ልማት እና በውጤት ላይ ነው ሲሉም ገልጸዋል።

ኢትዮጵያውያን ከውጭ የሚሰነዘሩ ማናቸውንም ተንኮሎችና ሴራዎች በጋራ በመቆም ማሸነፍ የምንችል ጽኑ ሕዝቦች ነን ብለዋል፡፡

ሚኒስትሩ አክለውም፣ ሀገራችን የምታከናውናቸውን የልማት ስራዎች እውነታና ትክክለኛ አቋም ለዓለም ማህበረሰብ በተለያዩ ቋንቋዎች ለማድረስ የሚደረጉ ጥረቶችን ማጠናከር እንደሚያስፈልግ አሳስበዋል።