የጥጥ ልማትና ምርታማነትን ለማሳደግ በቅንጅት እየተሰራ ነው

🔇Unmute

ሠመራ፤ጥቅምት 10/2019 (ኢዜአ)፦ በኢትዮጵያ ያሉ እምቅ አቅሞችን በመለየት የጥጥ ልማትና ምርታማነትን ለማሳደግ የተቀናጀ ጥረት እየተደረገ መሆኑን የግብርና ሚኒስቴር ገለጸ።

ዓለም አቀፍ የጥጥ ቀን “ጥጥን እናልማ፤ ሀብትን እናፍራ፣ ብልፅግናን እናረጋግጥ” በሚል መሪ ሐሳብ በአገር አቀፍ ደረጃ ለአራተኛ ጊዜ በሰመራ ከተማ በድምቀት ተከብሯል።

በመርሃ ግብሩ ላይ የተገኙት በግብርና ሚኒስቴር የእርሻና ሆርቲካልቸር ዘርፍ ሚኒስትር ዴኤታ አማካሪ ፕሮፌሰር አሊ መሐመድ እንደገለጹት፤ በኢትዮጵያ ያለውን የጥጥ ልማትና ምርታማነት በከፍተኛ ደረጃ ለማሳደግ መንግሥት ከባለድርሻ አካላት ጋር በቅንጅት እየሠራ ይገኛል።

ዘርፉን ይበልጥ በማሳደግ ለሀገር ውስጥ የጨርቃ ጨርቅና አልባሳት ፋብሪካዎች በቂ የጥሬ ዕቃ ግብዓት ማቅረብ እንደሚያስፈልግ የጠቆሙት ፕሮፌሰሩ፤ ይህም ከውጭ የሚገባውን ምርት በሀገር ውስጥ ለመተካት የሚደረገውን ሂደት እንደሚያቀላጥፈው አስረድተዋል።

ይህንን አገራዊ ግብ ለማሳካት የሁሉንም ባለድርሻ አካላት ቀጣይነት ያለው እገዛና ተሳትፎ እንደሚጠይቅ አሳስበዋል።

የአፋር ክልል በጥጥ ልማት ረገድ ያለውን ምቹ ሁኔታና የተገኘውን አበረታች ውጤት ወደ ላቀ ደረጃ ለማሸጋገር የተጀመረው የተቀናጀ ጥረት ተጠናክሮ እንደሚቀጥልም በመርሃ ግብሩ ላይ ተገልጿል።

በምክትል ርዕሰ መስተዳድር ማዕረግ የኢኮኖሚ ክላስተር አስተባባሪና የክልሉ ፕላንና ልማት ቢሮ ኃላፊ አቶ አሊ መሐመድ በበኩላቸው፤ እንደ ሀገር በጥጥ ልማት የተመዘገቡ ውጤቶችን በአፋር ክልል በተግባር ለመተርጎም የሚያስችሉ እምቅ አቅሞችና ጠቃሚ ልምዶች መቀሰማቸውን ገልጸዋል።

የአፋር ክልል ግብርናና ተፈጥሮ ሀብት ልማት ቢሮ ኃላፊ ኢንጂነር ያሲን ዓሊ ፤ በክልሉ የሚካሄደውን የጥጥ ልማት ከባለድርሻ አካላት ጋር በመቀናጀት ወደ ላቀ ደረጃ ለማድረስ እየተሰራ ነው ብለዋል።

በተለይም በምርት ላይ እሴት በመጨመር እና አምራቹን ከገበያ ጋር በቀጥታ የሚያገናኝ ዘመናዊ የገበያ ትስስርን በማጠናከር ረገድ በርካታ ውጤታማ ሥራዎች እንደሚከናወኑ ኃላፊው አረጋግጠዋል።

በሰመራ ከተማ በተካሄደው በዚህ አገር አቀፍ መርሃ ግብር ላይ የኢፌዴሪ ግብርና ሚኒስቴር ከፍተኛ አመራሮች፣ የአፋር ክልል ከፍተኛ የሥራ ኃላፊዎች፣ የጥጥ አምራች ባለሀብቶች፣ አርሶ አደሮችና ተመራማሪዎች ተገኝተዋል።