ኢትዮጵያ እና አይኤምኤፍ የሁለትዮሽ ውይይት አደረጉ

🔇Unmute

አዲስ አበባ፤ ጥቅምት 2/2019 (ኢዜአ)፦ ኢትዮጵያ እና የዓለም አቀፉ የገንዘብ ድርጅት (አይኤምኤፍ) ትብብራቸውን ማጠናከር ያለመ የሁለትዮሽ ምክክር አድርገዋል።

በኢትዮጵያ ብሔራዊ ባንክ ገዥ ኢዮብ ተካልኝ (ዶ/ር) የተመራ ልዑካን ቡድን በታይላንድ ባንኮክ ዛሬ በተጀመረው የዓለም አቀፉ የገንዘብ ድርጅት (አይኤምኤፍ) እና ዓለም ባንክ ዓመታዊ ስብሰባ ላይ እየተሳተፈ ይገኛል።

ኢዮብ ተካልኝ (ዶ/ር) ከስብስባው ጎን ለጎን ከዓለም አቀፉ የገንዘብ ድርጅት የአፍሪካ ክፍል ዳይሬክተር ዘይን ዘይዳን ጋር የሁለትዮሽ ውይይት አድርገዋል።

ውይይቱ በኢትዮጵያ የማክሮ ኢኮኖሚ ሪፎርም አጀንዳ ላይ ያተኮረ ነው።

ምክክሩ እስካሁን በሪፎርሙ የተመዘገቡ ውጤቶችን ለመገምገም፣ የቅርብ ጊዜ የኢኮኖሚ ሁኔታዎችን ለመዳሰስ እና በቀጣይ በሚተገበሩ የሪፎርም ስራዎች ቅድሚያ የሚሰጣቸውን አጀንዳዎች ለመለየት ማስቻሉ ተመላክቷል።

ሁለቱ ወገኖች የማክሮ ኢኮኖሚ ዘላቂነትን በማጠናከር ለአካታችና ዘላቂ የኢኮኖሚ እድገት የሚያስፈልጉ ምቹ ሁኔታዎችን መፍጠር በሚቻልበት ሁኔታ ላይ ሀሳቦችን ተለዋውጠዋል።