ኢትዮጵያ እና የዓለም ባንክ ለሕዝብ ተጨባጭ ውጤት የሚያስመዘግቡ የልማት ሥራዎችን ለማጠናከር እንደሚሰሩ ገለጹ

🔇Unmute

አዲስ አበባ፤ ጥቅምት 2/2019 (ኢዜአ)፦ ኢትዮጵያ እና የዓለም ባንክ ለሕዝብ ተጨባጭ ውጤት የሚያስመዘግቡ የልማት ሥራዎችን በትብብር ለማስቀጠል እንደሚሰሩ አስታወቁ።

የዓለም አቀፉ የገንዘብ ድርጅት (አይኤምኤፍ) እና ዓለም ባንክ ዓመታዊ ስብሰባዎች ዛሬ በታይላንድ ባንኮክ ዛሬ ተጀምሯል።

በኢትዮጵያ ብሔራዊ ባንክ ገዥ ኢዮብ ተካልኝ (ዶ/ር) የተመራ ከፍተኛ የልዑካን ቡድን በዓለም አቀፉ የገንዘብ ድርጅት (አይኤምኤፍ) እና የዓለም ባንክ ዓመታዊ ስብሰባዎች ላይ ለመሳተፍ ባንኮክ ይገኛል።

የገንዘብ ሚኒስትር ዴኤታ ትዕግስት ፍስሃ በልዑካን ቡድኑ ተካተዋል።

የኢትዮጵያ ልዑካን ቡድን ከዋናው ስብሰባ ጎን ለጎን ከዓለም ባንክ ምሥራቅና ደቡብ አፍሪካ ቀጣና ምክትል ፕሬዚዳንት ንዲያሜ ዲዮፕ (ዶ/ር) ጋር በሁለገብ የልማት ትብብሮች ላይ ምክክር አድርጓል።

ውይይቱ በኢትዮጵያና በዓለም ባንክ መካከል ያለውን የረጅም ጊዜ ጠንካራ አጋርነት ለመገምገም፣ የወደፊት የትብብር አቅጣጫዎችና ቅድሚያ የሚሰጣቸው ዘርፎች ለመወሰን ያለመ መሆኑ ተገልጿል።

ውይይት ከተደረገባቸው ዋና ዋና ጉዳዮች መካከል አዲሱ ሀገር አቀፍ የትብብር ማዕቀፍ (Country Partnership Framework) ይገኝበታል።

የማክሮ ኢኮኖሚ ዘላቂነትን ማረጋገጥ፣ ተወዳዳሪ የግል ዘርፍ እንዲኖር ማድረግና የወጪ ንግድን ማሳደግ፣ ዘመናዊና ከአየር ንብረት ለውጥ ጋር የተጣጣመ የግብርና እሴት ሰንሰለት መገንባት፣ ዘላቂ የመሠረተ ልማት ዝርጋታንና ቀጣናዊ የኃይል ትስስርን ማስፋፋት እንዲሁም የሰው ሀብት ልማትና የማህበራዊ ጥበቃ ሥርዓቶችን ማጠናከር በቀጣይነት ትኩረት የሚሰጣቸው አጀንዳዎች መሆናቸው ተመላክቷል።

በተጨማሪም ልዑኩ ኢትዮጵያ እ.አ.አ በ2027 ለምታዘጋጀው 32ኛው የተባበሩት መንግሥታት ድርጅት የአየር ንብረት ለውጥ ጉባኤ (COP32) ከዓለም ባንክ የሚደረገው የቴክኒክ ድጋፍ ተጠናክሮ እንዲቀጥል እና በሥራ ላይ ያሉ የልማት ፕሮጀክቶች አፈጻጸም እንዲፋጠን ጥሪ አቅርቧል።

ሁለቱም ወገኖች ለኢትዮጵያ ሕዝብ ተጨባጭና ዘላቂ ውጤት ለማስመዝገብ በትብብርና በቁርጠኝነት ለመሥራት ያላቸውን ዝግጁነት አረጋግጠዋል።