በአፋር ክልል የጥጥ ምርታማነትንና ጥራትን ለማሳደግ እየተከናወነ ያለው ተግባር ውጤት ተገኝቶበታል

🔇Unmute

ሰመራ ፤ ጥቅምት 11/2019 (ኢዜአ) ፦ በአፋር ክልል የጥጥ ዘር አቅርቦትን በራሰ አቅም በመሸፈን ምርታማነቱንና ጥራቱን ለማሳደግ እየተከናወነ ያለው ተግባር ውጤት ታይቶበታል ሲሉ በአፋር ክልል በጥጥ ልማት ስራ ላይ የተሰማሩ አልሚዎች ገለፁ።

«ጥጥን እናልማ፤ ሀብትን እናፍራ፣ ብልፅግናን እናረጋግጥ» በሚል መሪ ሐሳብ ዓለም አቀፍ የጥጥ ቀን በአገር አቀፍ ደረጃ ለአራተኛ ጊዜ በአፋር ክልል ሰመራ ከተማ በመስክ ምልከታ ተከብሯል።

በአፋር ክልል በጥጥ ልማት የተሰማሩ አልሚዎች እንዳሉት፤ በክልሉ የጥጥ ዘር አቅርቦትን በራሰ አቅም በመሸፈን ምርታማነቱንና ጥራቱን ለማሳደግ እየተከናወነ ያለው ተግባር ውጤት ታይቶበታል።

ከመተማ የመጡት አቶ ሃብቱ ፅዱ እንደገለጹት፤ የዝናብ እጥረት የሚስተዋልበት የአፋር ክልል በመስኖ እየተከናወነ ያለው የጥጥ ልማት የሚደነቅ ነው።

በተለይም የጥጥ ዘርን በውጭ ምንዛሬ ገዝቶ ወደ አገር ውስጥ ከማስገባት ይልቅ በራስ አቅም ተኪ ምርትን በማምረት ለመሸፈን እየተደረገ ያለው ጥረት ተጠናክሮ መቀጠል አለበት ብለዋል።

ከሁመራ የመጡት ጥጥ አምራች ጣሰው ማሞ በበኩላቸው፤ ዘርን በራሳቸው አቅም በመሸፈን የጥጥ ሰብል በዝናብ ከሚለማው ይልቅ በአፋር ክልል በመስኖ እየለማ ያለው ጥጥ የተሻለ ልምድ እንደወሰዱበት ተናግረዋል።

የሲምብሌታ አጠቃላይ እርሻ ልማት ባለቤት የሆኑት አቶ መሐመድ ኡዳ፤ በ1 ሺህ ሄክታር መሬት ላይ አምስት ዓይነት የጥጥ ዘሮችን በማላመድ ላይ መሆናቸውን ገልጸው ይህም በዘርፉ ለሚደረገው የምርምር ሥራ የሚያግዝ መሆኑን ገልጸዋል።

በአፋር ክልል ገቢረሱ ዞን ሃሩካ ወረዳ በ200 ሄክታር መሬት ላይ ጥጥ በማልማት ላይ የሚገኙት አሚና ኢሴ በበኩላቸው፤ የጥጥ ዘር አቅርቦት በባለቤትነት መሠራቱ በክልሉ በመካሄድ ላይ ካለው የጥጥ ልማት የተሻለ ምርት ለማግኘት የሚያስችል መሆኑን ገልጸዋል።

የጥጥ ምርታማነትን ለማሳደግ ከዘር አቅርቦት በተጨማሪ ፀረ አረምና ፀረ ተባይን ለመጠቀም በምርምር የተደገፈ ሥራ እየተሠራ መሆኑን የተናገሩት ደግሞ በግብርና ሚኒስቴር የጥጥ ልማት መሪ ሥራ አስፈጻሚ ሳምሶን አሰፋ ናቸው።

ክልሎችም በየአካባቢያቸው ያለውን ፀጋ ለይተው እንዲያለሙ ምቹ ሁኔታ እየተፈጠረ መሆኑን ገልጸዋል።