ከቤኒሻንጉል ጉሙዝ ክልል ባለፉት ሶስት ወራት 3 ሺህ 833 ኪሎግራም ወርቅ ወደ ብሄራዊ ባንክ ገብቷል

🔇Unmute

አሶሳ፤ ጥቅምት 20/2019 (ኢዜአ)፦ከቤኒሻንጉል ጉሙዝ ክልል ባለፉት ሶስት ወራት 3 ሺህ 833 ኪሎግራም ወርቅ ወደ ብሄራዊ ባንክ መግባቱን የክልሉ ማዕድን ሀብት ልማት ቢሮ አስታወቀ።

የቢሮው ኃላፊ አስር ኢብራሂም ለኢዜአ እንደገለፁት፤ በበጀት ዓመቱ 12 ሺህ 928 ኪሎ ግራም ወርቅ ወደ ብሔራዊ ባንክ ለማስገባት ዕቅድ ተይዞ ወደ ስራ ተገብቷል።

በበጀት ዓመቱ የመጀመሪያ ሩብ ዓመት ከባህላዊ እና ልዩ አነስተኛ የወርቅ አምራቾች 3 ሺህ 833 ኪሎግራም ወርቅ ወደ ብሄራዊ ባንክ መግባቱን ገልጸዋል።

አፈጻጸሙ ከባለፈው ዓመት ጋር ሲነፃፀር በእጥፍ መጨመሩን ገልፀው ለዚህም ፈቃድ የወሰዱ ተጨማሪ አምራቾችን ወደ ስራ ማስገባት በመቻሉ እና ግብይቱ ላይ የክትትል እና ቁጥጥር ስራ በመሠራቱ ነው ብለዋል።

በክልሉ የማዕድን ዘርፍ ለበርካታ ዜጎች በቀጥታም ሆነ በተዘዋዋሪ የኢኮኖሚ ምንጭ መሆኑን ጠቁመው ዘርፉ ለሀገር ኢኮኖሚ ግንባታ እና የስራ ዕድል ፈጠራ ከፍተኛ አስተዋጽኦ እያበረከተ እንደሚገኝ ተናግረዋል።

በበጀቱ ዓመቱ የመጀመሪያ ሶስት ወራትም በክልሉ ከ5 ሺህ 300 በላይ ዜጎች በዘርፉ የሥራ ዕድል ተጠቃሚ መሆናቸውን ጠቅሰዋል።

ከማዕድን ፈቃድና ከተለያዩ አገልግሎቶች ቢሮው በመጀመሪያው ሩብ ዓመት ከ36 ሚሊየን ብር በላይ ገቢ መሰብሰቡን ኃላፊው አስታውቀዋል።

በክልሉ የሚገኙ የማዕድን ሀብቶችን በማልማት የህብረተሰቡን ተጠቃሚነት ከማሳደግ ባለፈ ዘርፉ ለሀገር ኢኮኖሚ የሚያበረክተውን አስተዋጽኦ ለማስቀጠል በህግና ስርዓት እንዲመራ መደረጉን አስረድተዋል፡፡

የሚያጋጥሙ ችግሮችንም በየጊዜው በመገምገም እና መፍትሔ በመስጠት በማዕድን ዘርፉ የሚስተዋሉ ችግሮችን ለመቀነስ ቀጣይነት ያላቸው ስራዎች እንደሚሰሩ አመላክተዋል።