አገልግሎት አሰጣጥን ወደ ዲጂታልና ተንቀሳቃሽ አማራጮች በማሸጋገር የዜጎችን እርካታ ማሳደግ ለሀገራዊ ብልጽግና ዋነኛው መንገድ ነው

🔇Unmute

አዲስ አበባ፤ ሚያዝያ 14/2018(ኢዜአ)፦ አገልግሎት አሰጣጥን ወደ ዲጂታልና ተንቀሳቃሽ አማራጮች በማሸጋገር የዜጎችን እርካታ ማሳደግ ለሀገራዊ ብልጽግና ዋነኛው መንገድ መሆኑን ጠቅላይ ሚኒስትር ዐቢይ አሕመድ(ዶ/ር) ገለጹ፡፡

ጠቅላይ ሚኒስትር ዐቢይ አሕመድ (ዶ/ር) መሶብ የአንድ ማዕከል ተንቀሳቃሽ አገልግሎትን በይፋ ባስጀመሩበት ወቅት በኢትዮጵያ ለረጅም ዘመናት የቆዩ አገልግሎት የማግኘት ማነቆዎችን ለመፍታት በመንግስትም ሆነ በግል ዘርፍ ከፍተኛ የባህል ለውጥ ያስፈልጋል ብለዋል፡፡

አገልግሎት አሰጣጥን ወደ ዲጂታልና ተንቀሳቃሽ አማራጮች በማሸጋገር የዜጎችን እርካታ ማሳደግ ለሀገራዊ ብልጽግና ዋነኛው መንገድ መሆኑን ተናግረዋል፡፡

ባለፉት አስርት ዓመታት የተለያዩ መንግስታት የሲቪል ሰርቪስ ሪፎርም ለማድረግ ቢሞክሩም፣ አገልግሎቱን በሚፈለገው ልክ ማሻሻል እንዳልቻሉ አውስተዋል።

ለዚህም ዋናው ምክንያት ለረጅም ጊዜ የቆየውን ተቋማዊና ግለሰባዊ ባህል መቀየር፣ እጅ መንሻን ማስቀረትና ተገልጋይን አክብሮ የመሥራት ለውጥ ማምጣት ቀላል ባለመሆኑ ነው ሲሉ ገልጸዋል።

ከሀገራዊ ለውጡ ወዲህ ስትራቴጂ በመንደፍና ተቋማዊ ሥርዓት በመገንባት በአገልግሎት ዘርፉ እየተከናወነ ያለው ሪፎርም ተጨባጭ ውጤት እያመጣ መሆኑንም ተናግረዋል።

ግብርና፣ ኢንዱስትሪ፣ ቱሪዝም፣ ማዕድንና የዲጂታል የብዝኃ ዘርፍ የኢኮኖሚ ዕድገት ምሰሶዎችን ለማሳለጥ ቴክኖሎጂ ዋነኛው መሳሪያ መሆኑን ጠቁመዋል።

በዚህም በቴሌኮም፣ በፋይናንስና በሌሎች ዘርፎች ውጤት እየተመዘገበ እንደሚገኝ አንስተዋል።

መሶብ የአንድ ማዕከል አገልግሎት ማዕከላት በአንድ ዓመት ውስጥ ወደ 45 ከፍ ማደጉን ጠቅሰው ከ100 በላይ ለማድረስ እየተሠራ መሆኑንም አስታውቀዋል።

ባለፈው አንድ ዓመት ከአንድ ሚሊየን በላይ ዜጎች በመሶብ የአንድ ማዕከል አገልግሎቶች ማግኘታቸውን ጠቅሰው፥ 3 ሺህ የሚጠጉ የአገልግሎት ዓይነቶች በአንድ ማዕከል እየተሰጡ ነው ብለዋል።

በሥራ ላይ ያሉት የመሶብ ማዕከላት ለኢትዮጵያ በቂ ባለመሆናቸው፣ አገልግሎቱን ወደ ህብረተሰቡ ይበልጥ ተደራሽ ለማድረግ መሶብ የአንድ ማዕከል ተንቀሳቃሽ የአውቶቡስ አገልግሎት መጀመሩን ጠቅሰዋል፡፡

አገልግሎቱን የሚሰጡ ተሽከርካሪዎች በኤሌክትሪክና በጋዝ የሚሠሩ፣ ኢንተርኔትና የተሟላ መሠረተ ልማት ያላቸው መሆናቸውን በማንሳት በአዲስ አበባና በክልሎች በስፋት ይሠራባቸዋል ነው ያሉት።

ይህ እርምጃ በአፍሪካ ፈር ቀዳጅ የሚባል የመንግስት እርምጃ መሆኑንም ጠቅላይ ሚኒስትሩ ጨምረው አክለዋል።

የአገልግሎት አሰጣጡ ከተንቀሳቃሽ ተሽከርካሪዎች ባለፈ ወደ ሞባይል ስልክ መሸጋገር እንዳለበት ጠቁመው ለዚህ ደግሞ የዲጂታል መታወቂያ ወሳኝ መሆኑን አስረድተዋል።

ማንኛውም ዜጋ ወደ መሶብ ማዕከል በመሄድ የአገልግሎት አሰጣጡን ለውጥ መመልከት እንደሚችል ገልጸውም፣ በሚቀጥሉት ሁለትና ሶስት ዓመታት ሰዎች ካሉበት ስፍራ ሆነው ሙሉ አገልግሎት የሚያገኙበትን ሥርዓት ለመዘርጋት ጥረት እየተደረገ መሆኑን አስታውቀዋል።

ከዚህ የሚገኘው ትሩፋት ለሀገር ዕድገት መዋል እንዳለበትም ነው ጠቅላይ ሚኒስትር ዐቢይ አሕመድ (ዶ/ር) ያስገነዘቡት።