ኢትዮጵያ ቀጣናውን በኤሌክትሪክ አቅርቦትና መሰረተ ልማት በማስተሳሰር ለሰላምና የጋራ ብልፅግና ቁርጠኝነቷን እያሳየች ነው

🔇Unmute

አዲስ አበባ፤ ጥቅምት 15/2019 (ኢዜአ)፦ ኢትዮጵያ የምስራቅ አፍሪካ ቀጣናን በኤሌክትሪክ ሃይል አቅርቦትና በተለያዩ መሰረተ ልማቶች ለማስተሳሰር የምታደርገው ጥረት፣ ለቀጣናዊ ሰላም፣ መረጋጋትና የጋራ ብልፅግና ያላትን ፅኑ ቁርጠኝነት የሚያሳይ መሆኑን የኢትዮጵያ የቀድሞ ጠቅላይ ሚኒስትር ኃይለማርያም ደሳለኝ ገለጹ።

"በአፍሪካ የሰላም መንገዶች የኢኮኖሚ ሉዓላዊነትና የጂኦ ፖለቲካ ለውጥ" በሚል መሪ ሀሳብ በባህርዳር ሲካሄድ የቆየው 12ኛው የጣና ፎረም ዛሬ ፍፃሜውን ያገኛል።

በዛሬው እለት "የአፍሪካን የጂኦ ፖለቲካና ኢኮኖሚ መፃኢ ዕድል መቅረፅ" በሚል ርዕሰ ጉዳይ ላይ ከፍተኛ ደረጃ የፓናል ውይይት ተደርጓል።

የኢትዮጵያ የቀድሞው ጠቅላይ ሚኒስትር ኃይለማርያም ደሳለኝ በዚህ ወቅት እንዳሉት፤ የጣና ፎረም ለአፍሪካ ሰላም፣ ደህንነትና ልማት ወሳኝ አቅም ነው።

የአፍሪካ ሕብረት በዘንድሮው መድረክ የቀረበውን የጣና ፎረም በትኩረት በማየት ገቢራዊ ሊያደርገው እንደሚገባ ጥሪ አቅርበዋል።

በአፍሪካ ዘላቂ ሰላምና ልማትን ለማረጋገጥ በሀገራቱ መካከል ያለው ትብብር ተጠናክሮ መቀጠል እንዳለበት ገልጸዋል።

በአህጉሪቱ ጠንካራና ቀጣይነት ያለው ትብብር ለመፍጠር ጠንካራ የጂኦ ፖለቲካ አቅም መገንባት ይገባል ብለዋል።

የአህጉሪቱን ወሳኝ ማዕድናት የግጭት ሳይሆን የጋራ ልማትና ትብብር ማዕከል ማድረግ እንደሚገባም ገልጸዋል።

በሀገራት መካከል የተሟላ ትብብር መፍጠር ሳይቻል አህጉራዊ ግቦችን ማሳካት እንደማይቻልም አንስተዋል።

የአፍሪካ አህጉራዊ ነፃ የንግድ ቀጣና ትግበራ ያለበትን ውስንነት ለመቅረፍና የአምራች ኢንዱስትሪዎችን ጥምረት ለማሳደግ የላቀ የፖለቲካ ቁርጠኝነትና የተሟላ የሀገራት ትብብር እንደሚያስፈልግ ገልጸዋል።

ኢትዮጵያ በቀጣናው ለተሰማራው የሰላም ተልዕኮ የላቀ ድጋፍ በማድረግ ለሰላምና ልማት ያላትን ጽኑ አቋም እያሳየች መሆኑን ተናግረዋል።

ሀገሪቱ ቀጣናውን በኃይል በማስተሳሰር በጋራ ለመበልፀግ በትብብር እየሰራች መሆኑንም አብራርተዋል።

የናይጀሪያ የቀድሞው ፕሬዝዳንት ጉድላክ ጆናታን በበኩላቸው፣ የአፍሪካን የኢኮኖሚ ሉዓላዊነት ለማረጋገጥ ዘመኑን የዋጀ የቴክኖሎጂ አቅም መገንባት እንደሚገባ ገልጸዋል።

የአፍሪካውያን የቴክኖሎጂ ባለሙያዎች የአፍሪካ መፃኢ ዕድል መወሰን እንዳለባቸው አስገንዝበዋል።

የተለያዩ የዓለም ሀገራት ከራሳቸው አቅምና ክህሎት በመነሳት የኢኮኖሚ ሉዓላዊነታቸውን እንዳረጋገጡ በማንሳት፣ አፍሪካም ይሄን አካሄድ መከተል እንዳለባት አንስተዋል።

የናሚቢያ ብሔራዊ ዕቅድ ኮሚሽን ዋና ዳይሬክተር ካይሬ ምቡንዴ (ዶ/ር) ፤ ያለ ጠንካራ ሀገር፣ ያለ ጠንካራ አህጉራዊ ተቋማት ጠንካራ አፍሪካን መገንባት አይቻልም ብለዋል።

በአፍሪካ የኢንዱስትሪ አብዮትን በማቀጣጠል ሀብቷን ለሕዝብ ጥቅም ማዋል እንደሚገባም ገልጸዋል።

አፍሪካ በተፈጥሮ ሀብት የበለፀገች መሆኗን ገልጸው፤ የፋይናንስ ስርዓቱን በማዘመንና የሀገር ውስጥ የሀብት አሰባሰብን በመገንባት የውስጥ አቅምንና የገቢ ምንጮችን ማጠናከር አስፈላጊ መሆኑን አብራርተዋል።