በክልሉ በዝቅተኛ የኑሮ ደረጃ ላይ የሚገኙ የህብረተሰብ ክፍሎች በከተሞች የምግብ ዋስትና ስትራቴጂ ተጠቃሚ ሆነዋል

🔇Unmute

ጎንደር፤ መጋቢት 24/2018( ኢዜአ)፦ በአማራ ክልል በዝቅተኛ የኑሮ ደረጃ የሚገኙ ከ239 ሺ በላይ የህብረተሰብ ክፍሎች በከተሞች የምግብ ዋስትና ስትራቴጂ ተጠቃሚ መደረጋቸውን የክልሉ ከተማና መሰረተ ልማት ቢሮ ገለጸ።

በጎንደር ከተማ በ2ኛው ምዕራፍ ሁለተኛው ዙር መርሃ ግብር ታቅፈው ጥሪትና ሀብት በማፍራት ወደ ተሻለ ህይወት የተሸጋገሩ ከ4 ሺ በላይ የከተማ ልማታዊ ሴፍቲኔት ተጠቃሚ የህብረተሰብ ክፍሎች ዛሬ ተመርቀዋል፡፡

በምረቃ ስነ-ስርዓቱ ላይ የቢሮው ሃላፊ ሞላ መልካሙ (ዶ/ር) እንደተናገሩት የክልሉ መንግስት በዝቅተኛ የኑሮ ደረጃ ላይ የሚገኙ ዜጎችን ከድህነት ለማውጣት የከተሞች የምግብ ዋስትና ስትራቴጂዎችን ቀርጾ እየተገበረ ይገኛል፡፡

በክልሉ ጎንደር ከተማን ጨምሮ በ18 ከተሞች በአካባቢ ልማት፣ በቀጥታ ድጋፍ፣ በልዩ ድጋፍና በወጣቶች ፕሮጀክት ከ239 ሺህ 437 በላይ በዝቅተኛ የኑሮ ደረጃ ላይ የሚገኙ ዜጎችን ተጠቃሚ የማድረግ ተግባር እየተከናወነ ይገኛል ብለዋል።

የክልሉ መንግስት በዝቅተኛ የኑሮ ደረጃ የሚገኙ ዜጎችን ከተረጂነት ወደ አምራችነት ለማሸጋገር ከ60 ቢሊዮን ብር በላይ መድቦ ሰትራቴጂካዊ የሆኑ የድህነት ቅነሳ የልማት ስራዎችን ሲያከናውን መቆየቱን ጠቁመዋል፡፡

ለከተማ ልማታዊ ሴፍቲኔት መርሃ ግብርም በክልሉ ከ15 ቢሊዮን ብር በላይ በመመደብ ላለፉት ሶስት ተከታታይ ዓመታት በመርሃ ግብሩ የተቃፉ የከተማ ነዋሪዎች ሀብትና ጥሪት አፍርተው ከተረጂነት እንዲወጡ የማድረግ ስራዎች መከናወናቸውን አንስተዋል፡፡

በጎንደር ከተማም ከ43 ሺህ በላይ የህብረተሰብ ክፍሎች በልማታዊ ሴፍቲኔት ታቅፈው በተለያዩ የልማት ተግባራት በማሳተፍ ኑሯቸውን እንዲያሻሽሉ የቁጠባና የስራ ባህላቸውንም እንዲያዳብሩ መደረጉን ገልጸዋል፡፡

የከተማ ልማታዊ ሴፍቲኔት መርሃ ግብር ዜጎችን ከተረጂነት ከማውጣት ባሻገር ከተሞች የሚያከናውኗቸውን የልማት ስራዎች በማገዝ በኩል ትልቅ ፋይዳ አለው ያሉት ደግሞ የከተማ አስተዳደሩ ተቀዳሚ ምክትል ከንቲባ አቶ ቻላቸው ዳኘው ናቸው፡፡

በከተማው በልማታዊ ሴፍቲኔት መርሃ ግብር የታቀፉ ዜጎች በአካባቢ ጽዳት፣ በአረንጓዴ ልማትና በከተማ ግብርና ስራዎች ተሳታፊና ተጠቃሚ እንዲሆኑ ምቹ ሁኔታ ተፈጥሯል ብለዋል፡፡

የከተማው ልማታዊ ሴፍቲኔት መርሃ ግብር የገንዘብ ቁጠባንና የስራ ባህል ለውጥ እንዳመጣ አግዞኛል ያሉት ደግሞ ወይዘሮ መልሽው ሃይማርያም ናቸው፡፡

በቆጠቡት መነሻ ገንዘብ አነስተኛ የዳቦ መጋገሪያና የመሸጫ ሱቅ ከፍተው ለስድስት ሰዎች የስራ እድል በመፍጠር ኑሯቸውን በመቀየር ከድህነት ለመውጣት እንደቻሉም አስረድተዋል፡፡

የከተማ ልማታዊ ሴፍቲኔት መርሃ ግብር ተጠቃሚ የሆኑት ወይዘሮ ፀሐይ አወቀ በበኩላቸው ሀብትና ጥሪት በማፍራት አሁን ላይ አንዲት የወተት ላም ገዝተው በየቀኑ 12 ሊትር ወተት ለገበያ በማቅረብ ተጠቃሚ መሆን መጀመራቸውን ተናግረዋል፡፡

በምረቃ መርሃ ግብሩ ላይ የክልሉና የከተማ አስተዳደሩ አመራሮች የተገኙ ሲሆን ለመርሃ ግብሩ መሳካት አስተዋጽኦ ላበረከቱ አጋር አካላትም የእውቅና ምስክር ወረቀት ተሰጥቷል፡፡