መንግሥት ለኢንዱስትሪው ዘርፍ በሰጠው ልዩ ትኩረት የማምረት አቅማችን እየጨመረ ነው - አምራች ኢንዱስትሪዎች

🔇Unmute

አዲስ አበባ፤ ሚያዝያ 13/2018 (ኢዜአ)፦መንግሥት ለኢንዱስትሪው ዘርፍ በሰጠው ልዩ ትኩረት የማምረት አቅማቸው እየጨመረ መሆኑን አምራች ኢንዱስትሪዎች ገለጹ።

የሀገር በቀል ኢኮኖሚ ማሻሻያው የማምረት አቅምን ከማሳደግ ባሻገር የወጪ ንግድን በማስፋፋትና የውጭ ምንዛሬ ገቢ እንዲጨምር በማድረግ በኩል አስተዋጽኦ እያደረገ መሆኑንም ጠቁመዋል።

ከሀገር በቀል የኢኮኖሚ ማሻሻያ ዋና ትኩረቶች መካከል የአምራች ኢንዱስትሪውን አቅም በማሳደግ፣ ከውጭ የሚገቡ ምርቶችን በሀገር ውስጥ ምርቶች መተካትና የውጭ ምንዛሬን ማዳን ነው።

ይህ ስትራቴጂ ከፍተኛ የውጭ ምንዛሬ ይወጣባቸው የነበሩ ምርቶች በሀገር ውስጥ እንዲመረቱ በማስቻል ረገድ ተጨባጭ ውጤቶችን እያስመዘገበ ይገኛል።

ጠቅላይ ሚኒስትር ዐቢይ አሕመድ (ዶ/ር) “የሉዓላዊነት ልብ” በሚል ርዕሰ ጉዳይ ከኢትዮጵያ ብሮድካስቲንግ ኮርፖሬሽን ጋር ባደረጉት ቆይታ፤ ኢትዮጵያ ባለፉት ጥቂት ዓመታት ያጋጠሟትን ፈተናዎች ወደ ዕድል በመቀየር በኢንዱስትሪው ዘርፍ ተጨባጭ ለውጥ እያስመዘገበች ነው ብለዋል፡፡

በዚህ የለውጥ እርምጃ ማግስት 8 ሺህ ገደማ የነበሩት አነስተኛና መካከለኛ ኢንዱስትሪዎች፣ በአሁኑ ወቅት ከ26 ሺህ በላይ መድረሳቸውን ገልጸዋል።

ኢዜአ ያነጋገራቸው አምራቾች እንደገለጹት፤ መንግስት ለዘርፉ በሰጠው ልዩ ትኩረት የማምረት አቅማቸው በከፍተኛ ሁኔታ እየጨመረ መጥቷል።

ምርቶችን በማምረት ወደ ውጭ ገበያ ከመላክ ባለፈ የገቢ ምርቶችን በማስቀረት ረገድም ትልቅ ስኬት እያገኙ መሆኑን ጠቁመዋል።

በሁዋጃን ልዩ ኢኮኖሚክ ዞን የጎበዝ የፀሐይ ኃይል ሶላር ሴል ማምረቻ ሥራ አስኪያጅ በረከት ኃይሉ እንደገለጹት፤ ድርጅታቸው ምርቶቹን ወደ አሜሪካ፣ ካናዳ፣ ቬትናም እና መካከለኛው ምሥራቅ ሀገራት እየላከ ነው፡፡ በዚህም ከ600 በላይ ለሚሆኑ ዜጎችም የሥራ ዕድል መፍጠሩን ተናግረዋል።

በመንግስት በኩል የሚደረገው ድጋፍ የማምረት አቅማቸውን እንዲያድግ ላቅ ያለ አስተዋጽኦ ማድረጉንም አክለዋል።

የዳቼ የምግብ ማቀነባበሪያ ፋብሪካ ፕላንት ማኔጀር ዐቢይ በቀለ በበኩላቸው፤ በመንግሥት በየጊዜው በሚደረግላቸው ድጋፍና ክትትል ምርቶቻቸውን በጥራትና በፍጥነት ለገበያ ማቅረብ እንዳስቻላቸው ገልጸዋል።

በአሁኑ ወቅት በአራት ፋብሪካዎች 46 ዓይነት የታሸጉ ምግቦችን በማምረት ለሀገር ውስጥና ለውጭ ገበያ በተመጣጣኝ ዋጋ እያቀረቡ እንደሚገኙ አንስተዋል።

የኢንዱስትሪ ሚኒስትር ዴኤታ ታረቀኝ ቡሉልታ እንደገለጹት፤ መንግሥት ለማኑፋክቸሪንግ ዘርፉ የሰጠው ትኩረት የምርትና ምርታማነት ለውጥ እንዲመጣ አድርጓል።

ከዚህ ቀደም አምራች ኢንዱስትሪዎች ከፍተኛ የውጭ ምንዛሬ ይወጣባቸው የነበሩ ምርቶችን በሀገር ውስጥ በመተካትና የውጭ ምንዛሬ ግኝት እንዲኖር በማስቻል ትልቅ ውጤት እያመጡ ነው ብለዋል።

በቀጣይም መንግሥት የፋይናንስ አቅርቦትን ጨምሮ ሌሎች አስፈላጊ ድጋፎችን አጠናክሮ እንደሚቀጥል ሚኒስትር ዴኤታው አረጋግጠዋል።