የኢትዮጵያን የዲጂታል ኢኮኖሚ የሚያፋጥኑ ውጤታማ የቴክኖሎጂ አሰራሮች ተግባራዊ እየተደረጉ ነው 

🔇Unmute

አዲስ አበባ፤ ሰኔ 9/2018(ኢዜአ)፦ የኢትዮጵያን የዲጂታል ኢኮኖሚ ሥርዓት የሚያፋጥኑ ውጤታማ የቴክኖሎጂ አሰራሮች ተግባራዊ እየተደረጉ መሆኑን የኢኖቬሽንና ቴክኖሎጂ ሚኒስትር በለጠ ሞላ (ዶ/ር) ገለጹ።

የኢትዮጵያ ቤተ መዛግብትና ቤተ መጻሕፍት አገልግሎት ዘመናዊ የቤተ መጻሕፍት ሥርዓት መዘርጋት የሚያስችለውን የጽሑፍ ሃብቶችን ወደ ዲጂታል የመቀየር ሥራ በይፋ ጀምሯል።

የኢኖቬሽንና ቴክኖሎጂ ሚኒስትር በለጠ ሞላ (ዶ/ር)፤ ዘመናዊት ኢትዮጵያን ለመገንባትና የተሟላ ዲጂታል ኢኮኖሚ እውን ለማድረግ በርካታ ሥራዎች እየተከናወኑ መሆኑን ገልጸዋል።

የዲጂታል ሥነ-ምህዳርን መገንባት፣ መሰረተ ልማትን ማሟላትና ምቹ ፖሊሲ በመንደፍ ከመንግሥታዊና መንግሥታዊ ካልሆኑ ተቋማት ጋር በቅንጅት መስራትን ያጠቃልላል።

የኢትዮጵያን የዲጂታል ኢኮኖሚ ሥርዓት የሚያፋጥኑ ውጤታማ የቴክኖሎጂ አሰራሮች ተግባራዊ እየተደረጉ መሆኑን ተናግረዋል።

በዋናነት ሀገሪቱን ወደ ዘመናዊ የኢኮኖሚ ስርዓት በማስገባት ተከታታይነት ያለው ዕድገት ለማስመዝገብ ያለመ እንደሆነም ጠቁመዋል።

ለአብነትም ከወረቀት አሠራር ወደ ዲጂታል የመሸጋገር እና የታሪክ ሀብቶችን ወደ ዲጂታል ቋት በማስገባት ለቀጣይ ትውልድ የማስተላለፍ ሥራ እየተሠራ ይገኛል ብለዋል።

የኢትዮጵያ ቤተ መዛግብትና ቤተ መጻሕፍት አገልግሎት የጀመረው ጉዞ የዲጂታል ኢትዮጵያ 2030 ስትራቴጂ አካል ሲሆን፣ በቀጣይ በሁሉም ዘርፎች ተጠናክሮ እንደሚቀጥል ጠቅሰዋል።

በቤተ መጻሕፍቱ የሚገኙ የሀገር ሀብቶችን ጠብቆና ተንከባክቦ ለቀጣይ ትውልድ ለማሻገር የዲጂታላይዜሽን ሥራው ወሳኝ መሆኑን ሚኒስትሩ አብራርተዋል።

የባህልና ስፖርት ሚኒስትር ሸዊት ሻንካ በበኩላቸው፤ የኢትዮጵያ ቤተ መዛግብትና ቤተ መጻሕፍት አገልግሎት የሀገር ታሪክ፣ ባህል እና ማንነት የተሰነደበት ማዕከል መሆኑን ገልጸዋል።

ይህ የተጀመረው የዲጂታላይዜሽን ሥራ ታሪካችንን ለቀጣይ ትውልድ በታማኝነት ለማስተላለፍና ማንኛውም ሰው የሚፈልገውን መረጃ በቀላሉ እንዲያገኝ ያስችላል ብለዋል።

ቤተመዛግብትና ቤተመጻሕፍት የኢትዮጵያውያንን ባህል፣ ታሪክ፣ ትውስታዎች፣ ፍልስፍናዎች በተገቢ መንገድ ሰንዶ የያዘ ተቋም ነው ሲሉም ተናግረዋል።

እዚህ ተቋም ላይ ኢንቨስት የምናደርጋቸው ሀብቶች በሙሉ ለሚቀጥለው ትውልድ የምትሆን ኢትዮጵያ ግንባታ ሂደት ላይ ትልቅ አበርክቶና አስተዋጽኦ ያለው ስራ ነው ብለዋል።

የኢትዮጵያ ቤተ መዛግብትና ቤተ መጻሕፍት አገልግሎት ዋና ዳይሬክተር ሰርፀ ፍሬስብሐት እንደገለጹት፤ አገልግሎቱ ከ83 ዓመታት በፊት ጀምሮ መረጃዎችን በመሰነድና በማስቀመጥ ለትውልድ እያስተላለፈ የሚገኝ ተቋም ነው።

የጽሑፍ ሀብቶችን ወደ ዲጂታል የመቀየር ሥራ የኢትዮጵያን የመረጃ ሃብቶች በማሰባሰብና በማደራጀት ለቀጣይ ትውልድ ለማስተላለፍ ዕድል ይፈጥራል ነው ያሉት።

በወረቀት ላይ የሰፈሩ ታሪካዊ መረጃዎች ከጊዜ ብዛትና ከአያያዝ ጉድለት እንዳይጠፉና እንዳይበላሹ ዘላቂ ጥበቃ ለማድረግ እንደሚያስችልም ተናግረዋል።

በመጀመሪያው ምዕራፍ 20 ሚሊየን ገጾችን ወደ ዲጂታል የመቀየር ስራ እንደሚከናወን በመድረኩ ተገልጿል።