በኢትዮጵያ ለዲጂታላይዜሽን የተሰጠው ትኩረት ዓለም አቀፍ ተወዳዳሪነታችንን እያሳደገልን ነው- ተማሪዎች

🔇Unmute

አዲስ አበባ፤ ሰኔ 7 /2018 (ኢዜአ)፦ በኢትዮጵያ ለዲጂታላይዜሽን የተሰጠው ትኩረት ዓለም አቀፍ ተወዳዳሪነትን እያሳደገልን ነው ሲሉ በዓለም አቀፍ የሁዋዌ አይሲቲ የፍፃሜ ውድድር በፈጠራ ዘርፍ አሸናፊ የሆኑ ተማሪዎች ገለፁ።

የዲጂታል ኢትዮጵያ 2030 ስትራቴጂ በቀጣዮቹ አምስት ዓመታት የ5ጂ ኔትወርክን ሙሉ በሙሉ ተደራሽ ለማድረግ፣ የፋይዳ ዲጂታል መታወቂያን ለማስፋፋት እንዲሁም ዜጎችን በዲጂታል ክህሎት ማብቃት ላይ ትኩረት አድርጓል።

ለስትራቴጂው መሳካት አስቻይ ከሆኑ መርሃ-ግብሮች አንዱ የሆነው የአምስት ሚሊዮን ኢትዮ-ኮደርስ መርሐ-ግብርም የሰው ኃይል አቅምን በመገንባት፣ ሀገሪቱን ከቴክኖሎጂ ተጠቃሚነት ወደ ቴክኖሎጂ ፈጣሪነት ለማሸጋገር ፋይዳው የጎላ ነው።

ከሰኔ 2 እስከ 5ቀን 2026 በቻይና ሼንዘን በተካሄደው ዓለም አቀፍ የሁዋዌ አይሲቲ የፍፃሜ ውድድር ሁለተኛ በመውጣት የብር ሜዳሊያ ያሸነፉት የአዲስ አበባ ሳይንስና ቴክኖሎጂ ዩኒቨርሲቲ ተማሪዎችም መርሃ ግብሩ ለዓለም አቀፍ ተወዳዳሪነት ድርሻ እንዳለው ተናግረዋል።

የዩኒቨርሲቲው ሦስት ተማሪዎች በፈጠራ ዘርፍ (Innovation Track) ኢትዮጵያን በመወከል ለውድድር ቀርበው ከ40 ሀገራት በላይ ከሚገኙ ከፍተኛ የዩኒቨርሲቲ ተማሪዎች ጋር በመወዳደር አሸናፊ ሆነዋል።

በአዲስ አበባ ሳይንስና ቴክኖሎጂ ዩኒቨርሲቲ የሶፍትዌር ምህንድስና ተመራቂ ተማሪ ፍስሃ አከለ በውድድሩ ሰውሰራሽ አስተውሎት በመጠቀም የጡት ካንሰር ያለበትን ደረጃ በመለየት ለባለሙያዎች ውጤት የሚሰጥ ስርዓት ይዘው ቀርበዋል።

አብዛኛው የጡት ካንሰር ታማሚዎች ወደጤና ተቋም የሚመጡት አስጊ ደረጃ ከደረሱ በኃላ በመሆኑ የፈጠራ ስራቸው ለዚህ ችግር መፍትሄ ለመስጠት በማሰብ መሰራቱንና ፕሮጀክቱን ወደተግባር ለመቀየር እየሰሩ መሆኑን ገልጿል።

ሌላው የውድድሩ አሸናፊ ሚካኤል ወርቅነህ እንዳለው በውድድሩ ሶስት አባላትን በመያዝ በዩኒቨርሲቲ መምህራቸው መሪነት መሳተፋቸውን ገልፆ ውድድሩ ልምዶችን ለመጋራት እድል የፈጠረ መሆኑንም አንስቷል።

ኢትዮጵያ ለዲጂታላይዜሽን የሰጠችው ትኩረት ስራቸውን ለማጎልበት ጉልህ ሚና እንዳለው ጠቅሶ፤ የ5 ሚሊየን ኮደርስ ስልጠና የዲጂታል እውቀትን ለማሳደግ አስተዋፅኦ እንዳለውም ተናግሯል።

የቡድኑ አባል የሆነው የዩኒቨርሲቲው የሶፍትዌር ምህንድስና ተመራቂ ተማሪ ሚኪያስ ጎይቶም ዓለም አቀፍ ተወዳዳሪነት ለማሳደግ የሰው ኃይልን ማብቃት ወሳኝ መሆኑንና የኮደርስ ስልጠና በዚህ ረገድ ጉልህ ድርሻ እንዳለው ገልጿል።

ተማሪዎቹን በማስተባበር ቡድኑን የመሩት የዩኒቨርሲቲው የሶፍትዌር ኢንጂነሪንግ መምህር ጌትነት ግርማ በውድድሩ በተገኘው ውጤት ዩኒቨርሲቲው ከምስራቅ አፍሪካ በዘርፉ ምርጥ ዩኒቨርሲቲ ሆኖ እንዲመረጥ አስችሏል ብለዋል።

ይህንን ተከትሎ ዩኒቨርሲቲው ፕሮግራሙን ወደሌሎች ዩኒቨርሲቲዎች ለማስፋት እየሰራ መሆኑን ተናግረዋል።

ውድድሩ ዩኒቨርሲቲው ዓለም አቀፍ ደረጃውን የጠበቀ ትምህርት እየሰጠ መሆኑን ማረጋገጫ ነው ያሉት ደግሞ የዩኒቨርሲቲው የአካዳሚክ ፕሮግራሞች ዳይሬክተር ሙሲን ከሊል (ዶ/ር) ናቸው።