በክልሉ የሲቪል ማህበረሰብ ድርጅቶች የህዝብ ተጠቃሚነትን ለማረጋገጥ የተጀመሩ ስራዎችን ማጠናከር ይጠበቅባቸዋል- ርእሰ መስተዳድር እንዳሻው ጣሰው (ዶ/ር)

🔇Unmute

ሆሳዕና ፤ ነሐሴ 21/2018 (ኢዜአ) ፦ የሲቪል ማህበረሰብ ድርጅቶች የህዝብ ተጠቃሚነትን ለማረጋገጥ የሚጠበቅባቸውን ሚና እንዲወጡ የማዕከላዊ ኢትዮጵያ ክልል ርዕሰ መስተዳድር እንዳሻው ጣሰው (ዶ/ር) ጥሪ አቀረቡ።

''የመንግሥትና የሲቪል ማህበረሰብ ድርጅቶች የልማት አጋርነት ለላቀ እመርታ" በሚል መሪ ሀሳብ በክልሉ መንግሥትና ሲቪል ማህበረሰብ ድርጅቶች ፎረም ለ2ኛ ጊዜ የተዘጋጀ የምክክር መድረክ በሆሳዕና ከተማ በመካሄድ ላይ ይገኛል።

የማዕከላዊ ኢትዮጵያ ክልል ርዕሰ መስተዳድር እንዳሻው ጣሰው (ዶ/ር)በዚሁ ወቅት እንዳሉት፤ የሲቪል ማህበረሰብ ድርጅቶች የህዝብ ተጠቃሚነትን ለማረጋገጥ የተጀመሩ ስራዎችን በማገዝ የበኩላቸውን አስተዋጽኦ ሊያበረክቱ ይገባል።

በአሁኑ ወቅት በክልሉ በሪፎርም እሳቤና በመደመር መንገድ የተጀመሩ ስራዎች ውጤት እያመጡ እንደሚገኙም ርዕሰ መስተዳድሩ ገልፀዋል።

የሲቪል ማህበረሰብ ድርጅቶች በተለያዩ መስኮች በመሳተፍ በመንግሥት ያልተሸፈኑ ክፍተቶችን በመሙላት የማህበረሰቡን ተጠቃሚነት ለማረጋገጥ የሚያስችሉ ውጤታማ ተግባራትን እያከናወኑ እንደሚገኙ አረጋግጠዋል።

በክልሉ ፈጣን እድገት ለማስመዝገብ የሁሉንም አካላት ተሳትፎና ቅንጅታዊ አሰራር የሚጠይቅ ሲሆን ሀገሩን የሚወድ በስነ-ምግባር የታነጸ ዜጋን ከመፍጠር ባለፈ የህዝቦችን ተጠቃሚነት ለማረጋገጥ የሚጠበቅባቸውን ሚና እንዲወጡ አሳስበዋል።

የክልሉ ፋይናንስ ቢሮ ኃላፊ ወ/ሮ ዘይቱና ኢብራሂም በበኩላቸው፤ በክልሉ 97 የሚጠጉ የሲቪል ማህበረሰብ ድርጅቶች ህጋዊ እውቅና አግኝተው በመንቀሳቀስ ላይ እንደሚገኙ ተናግረዋል።

ድርጅቶቹ በማህበራዊና ኢኮኖሚያዊ መስኮች የነቃ ተሳትፎ በማድረግ የዜጎችን ተጠቃሚነት ለማረጋገጥ ዘርፈ-ብዙ የልማት ስራዎችን በማከናወን ላይ እንደሚገኙም ገልጸዋል።

በተለይም በማህበራዊ፣ በኢኮኖሚ እና በሰላም እሴት ግንባታ ዘርፎች ከ13 ቢሊዮን ብር በላይ በሚሆን ካፒታል ከ220 በላይ ፕሮጀክቶችን በመተግበር ላይ እንደሚገኙ አብራርተዋል።

ድርጅቶቹ የምግብ ዋስትናን ከማረጋገጥ ጀምሮ ምርታማነትን በማሳደግ ከተረጂነት ለመውጣት የሚደረገውን ጥረት በማጠናከር የጀመሩትን አጋርነት ሊያጠናክሩ እንደሚገባም ወ/ሮ ዘይቱና አሳስበዋል።

በዚሁ የምክክር መርሃ ግብር ላይ የክልሉ ከፍተኛ አመራሮች፣ የፌዴራልና የክልል የሲቪል ማህበረሰብ ድርጅቶች ዋና ስራ አስፈጻሚዎች እና ጥሪ የተደረገላቸው እንግዶች በመሳተፍ ላይ ይገኛሉ።