ለሀገር ግንባታ የዜጎች አንድነትና ሁለንተናዊ ቅንጅት መጠናከር አለበት

🔇Unmute

ሀዋሳ፤ ጥቅምት 11/2019 (ኢዜአ) ፦የሀገርን ብሔራዊ ጥቅም በማስከበር የበለጸገች ሀገር ለመገንባት በሚደረገው ጥረት የዜጎችን ቅንጅታዊ ጥረት ማጠናከር እንደሚገባ በሃዋሳ ከተማ የሚኖሩ አስተያየት ሰጪዎች ገለጹ።

ኢዜአ በሃዋሳ ከተማ ያነጋገራቸው አስተያየት ሰጪዎች፤ ብሔራዊ ጥቅምን የማስጠበቅ አጀንዳ የሁሉም እንዲሆን የተጀመሩ ቅንጅታዊ ጥረቶች መጠናከር እንዳለባቸው አንስተዋል።

የትውልዱ ቁጭት የሆነው የባህር በር ባለቤትነት ጥያቄን ጨምሮ የሀገርን ብሔራዊ ጥቅሞችን በማስከበር የበለጸገች ሀገር ለመገንባት መላው ዜጋ በቅንጅት እያከናወናቸው ያሉ ተግባራትም ተጠናክረው መቀጠል እንዳለባቸው ገልጸዋል።

የታሪክ መምህርና ፖለቲከኛው አቶ በለጠ ስገቦ እንደገለጹት፤ በሃገሪቱ እየተመዘገበ ያለውን ልማት ለማስቀጠል የባህር በር ባለቤት መሆን ጠቀሜታው የጎላ ነው።

የባህር በር ባለቤትነት ጥያቄ ከሀገራዊ ልማት ጋር የተያያዘ አንገብጋቢ ጉዳይ መሆኑን አነስተው፣ የባህር በር ለማግኘት ዜጎች ከመንግስት ጎን በመሆን የጀመሩት ሥራ መጠናከር አለበት ብለዋል።

ታላቁ የኢትዮጵያ ሕዳሴ ግድብን ጨምሮ በዜጎች ተሳትፎ ብሔራዊ ጥቅምን የማስከበር ሥራ ውጤት እያስገኘ በመሆኑ፣ የባህር በር ባለቤት ለመሆን በትውልድ ላይ የሚሰራውን ቅንጅታዊ ሥራ ማስቀጠል ይገባል ብለዋል።

የዓለም አቀፍ ታሪክ፣ የቀይ ባህርና ቀጣናው ጉዳዮች ተመራማሪ እንዲሁም የሲዳማ ክልል የመንግስት ኮሙኒኬሽን ቢሮ ሃላፊ አቶ ወሰንየለህ ስምኦን በበኩላቸው፣ ፈጣን የኢኮኖሚ ዕድገትን ለማስቀጠል የባህር በር ወሳኝ መሆኑን ጠቅሰዋል።

ኢትዮጵያ የዓለም የንግድ እንቅስቃሴ ካለበት ቀይ ባህር በሴራ መገለሏና ባህር በር አጥታ እንድትኖር መደረጉ ልማትና ዕድገቷን ለማደናቀፍ በታሪካዊ ጠላቶች የተሰራ ደባ መሆኑንም አመልክተዋል፡፡

የሀገርን ብሔራዊ ጥቅም በማስቀደም የበለጸገች ሀገር ለመገንባት በመንግስትና በዜጎች የተጀመረው ሁለንተናዊ ጥረት እንዲሳካ በተለያየ መንገድ ድጋፋቸውን እንደሚያጠናክሩ ገልጸዋል።

በተለይ በአሻጥር ሀገር እንድትጎዳ የተደረገበት ታሪካዊና ፖለቲካዊ ስህተት እንዲታረም ከሚሰሩት ሥራ በተጨማሪ የዜጎችን ግንዛቤ የማሳደግ ሚናቸውን እንደሚወጡ አረጋግጠዋል።

ኢትዮጵያ ለዘመናት የቀይ ባህር ወደቦችን የንግድና የውጭ ግንኙነት መስመር አድርጋ ስትጠቀም የቆየች ገናና ሀገር እንደነበረች የገለጹት ደግሞ የልማትና የህዝብ አስተዳደር ባለሙያው አየለ አዳቶ (ዶ/ር) ናቸው።

ምጽዋ፣ አዱሊስ፣ አሰብና ሌሎች የቀይ ባህር ወደቦችን ስትጠቀም የቆየች ሀገር እንደነበረች አስታውሰው፣ በሴራ ምክንያት የባህር በሯን አጥታ ተዘግታ ቆይታለች ብለዋል።

የባህር በር ባለቤትነት ጉዳይ ብሔራዊ ጥቅምን ማረጋገጥ ነው ያሉት አየለ (ዶ/ር)፣ ያጣነውን የባህር በር በሰጥቶ መቀበል መርህ መልሶ ለማግኘት የተጀመረው ዲፕሎማሲያዊ ጥረት የሚደገፍ መሆኑን ተናግረዋል።