በዞኑ የደረሰው ሰብል ወቅቱን ባልጠበቀ ዝናብ እንዳይበላሽ በሜካናይዜሽንና በሰው ሃይል በመሰብሰብ ላይ ይገኛል

🔇Unmute

አዳማ፤ ጥቅምት 17/2019 (ኢዜአ)፦ በማዕከላዊ ኦሮሚያ ዞን የደረሰ ሰብል ወቅቱን ባልጠበቀ ዝናብ እንዳይበላሽ፣ በሜካናይዜሽንና በሰው ኃይል የተደገፈ የሰብል ስብሰባ በስፋት እየተካሄደ እንደሚገኝ የዞኑ ግብርና ጽሕፈት ቤት አስታወቀ።

የማዕከላዊ ኦሮሚያ ዞን ግብርና ጽሕፈት ቤት ሃላፊ አቶ መስፍን ተሾመ ለኢዜአ እንደገለጹት በዞኑ በመኸር አዝመራ የለማው ሰብል ወቅቱን ባልጠበቀ ዝናብ እንዳይበላሽ በፍጥነት ለመሰብሰብ ርብርብ እየተደረገ ይገኛል።

በ2018/19 የምርት ዘመን ስንዴ፣ የቢራ ገብስ፣ ጤፍ፣ ሩዝ፣ በቆሎ፣ ቦሎቄና ሌሎች የጥራጥሬ ሰብሎች በዋናነት በዞኑ ከለሙት ሰብሎች መካከል ናቸው።

ሰብሎችን በዘመናዊ ቴክኖሎጂና ደረጃቸውን በጠበቁ ግብዓቶች ማልማት በመቻሉ እንዲሁም የሙያተኞች ተከታታይ ድጋፍ በመደረጉ፣ የምርት ጥራትን በመጠበቅ በተሻለ ደረጃ ላይ እንደሚገኝም ሃላፊው ገልጸዋል።

አዳዲስ የምርት ማሳደግያ አሰራሮችና ግብዓት ከመጠቀም ባለፈ ለምርትና ምርታማነት መቀነስ ምክንያት የሆኑ ተባዮችና የሰብል በሽታዎችን በመከላከል ረገድም በዞኑ ውጤታማ ስራ መሰራቱንም ገልጸዋል።

በዞኑ ስንዴ፣ ጤፍና ገብስን ጨምሮ በአብዛኛው ቆላማና ወይናደጋ አካባቢዎች ሰብል ለአጨዳ በመድረሱ፤ ወቅቱን ባልጠበቀ ዝናብ እንዳይበላሽ በኮምባይነር ሃርቨስተርና በሰው ኃይል የመሰብሰብ ርብርብ እየተደረገ መሆኑን ገልጸዋል።

አርሶ አደሩ በደቦና በቤተሰብ ጉልበት የደረሰውን ሰብል በፍጥነት በማንሳት፣ ወቅቱን ያልጠበቀ ዝናብ በምርት አሰባሰብ ላይ ከሚያሳድረው ተፅዕኖና ጉዳት ራሱን ለመጠበቅ በተቀናጀ ሁኔታ ርብርብ ማድረግ እንዳለበት አስገንዝበዋል።

ዞኑ የማጨጃ ኮምባይነሮችን ከህብረት ሥራ ዩኒየኖችና ከግለሰቦች በተመጣጣኝ ዋጋ በኪራይ ለአርሶ አደሩ ለማቅረብ እየሰራ መሆኑን ጠቅሰው፤ በተጨማሪም አርሶ አደሮች በማህበር ተደራጅተው የገዟቸውን ኮምባይነሮች በማቀናጀት የደረሰውን ሰብል የመሰብሰብ ሥራ በትኩረት እየተከናወነ ይገኛል ብለዋል።

በማእከላዊ ኦሮሚያ ዞን በመኸር ከለማው 2 ነጥብ 8 ሚሊዮን ሄክታር መሬት ከ130 ሚሊዮን ኩንታል በላይ ምርት እንደሚጠበቅም ጨምረው ገልጸዋል።