የሀገር ውስጥ ምርት ስሌትን ማዘመን የኢኮኖሚውን እውነተኛ አቅምና እድገት በትክክል ለመለካት ያስችላል

🔇Unmute

አዲስ አበባ ፤ ህዳር 2/2019 (ኢዜአ) ፦ የሀገር ውስጥ ምርት ስሌትን ማዘመን የኢኮኖሚውን እውነተኛ አቅም፣ አፈጻጸምና መዋቅራዊ ሽግግር በትክክል ለመገምገም እንደሚያስችል የምጣኔ ሀብት ባለሙያ ዘመዴነህ ንጋቱ ገለጹ።

የብሔራዊ ስትራቴጂ ሚኒስቴር የተሻሻለውን ጠቅላላ የሀገር ውስጥ ምርት ግመታን ወቅታዊ የማድረግ ስራ በይፋ ማሳወቁ ይታወሳል።

በዚህም የተሻሻለው ጠቅላላ የሀገር ውስጥ መረጃ ቋሚ ዓመት ከ2008 ወደ 2017 ዓ.ም እንዲቀየር ተደርጓል።

የጠቅላላ የሀገር ውስጥ ምርት ቋሚ ዓመት ለውጥ ወቅታዊ ግምት መሰረት ጠቅላላ የሀገር ውስጥ ምርቱ 59 ነጥብ 2 በመቶ አድጓል።

የምጣኔ ሀብት ባለሙያ ዘመዴነህ ንጋቱ ከኢዜአ ጋር ባደረጉት ቆይታ፣ የኢትዮጵያ ኢኮኖሚ ያስመዘገበውን ፈጣን እና ሁለገብ ዕድገት ትክክለኛ መዋቅራዊ ገጽታ ለማሳየት፣ አጠቃላይ የሀገር ውስጥ ምርት ስሌት መለኪያ ማሻሻያ (Rebased) መደረጉ ተገቢነት ያለው ነው ብለዋል።

ባለሙያው እንደገለጹት፣ ቀደም ሲል ጥቅም ላይ ይውሉ የነበሩት መለኪያዎች የተዋቀሩት ሀገሪቱ በግብርናው ዘርፍ ብቻ ጥገኛ በነበረችበት ወቅት ነው።

በአሁኑ ወቅት የቴሌኮም፣ የፋይናንስ አገልግሎት፣ የዲጂታል ቴክኖሎጂ እና የማኑፋክቸሪንግ ዘርፎች እያስመዘገቡት ያለውን ግዙፍ እምቅ አቅም እና አስተዋጽኦ ያላካተቱ በመሆናቸው፣ ወቅታዊውን ሀገራዊ የኢኮኖሚ እውነታ በሚገባ እንደማያሳዩ ተናግረዋል።

ፈጣን የኢኮኖሚ ዕድገት ያስመዘገቡ ሌሎች የዓለም አቀፍ ሀገራትም ኢኮኖሚያቸውን በዘመናዊ መልኩ መለካት የተለመደ መሆኑን አንስተዋል።

የኢትዮጵያ ኢኮኖሚ የደረሰበትን እውነተኛ ዕድገት የሚመጥን እና ዓለም አቀፍ ደረጃውን በጠበቀ መልኩ የሀገር ውስጥ ምርት ስሌት መለኪያ ማሻሻያ መደረጉ ተገቢነት ያለው መሆኑን ገልጸዋል።

ይህም የዘርፉ ምሁራንና ባለሙያዎች በቂ ጊዜ ሰጥተውበት የሚያከናውኑት መሆኑንም አስረድተዋል።

የኢትዮጵያ የኢኮኖሚ ዘርፎችን አፈጻጸም በዘመናዊ መንገድ በመለካት የዕድገት አስተዋጽኦቸውን ለመገምገም እና ትኩረት የሚሹ መስኮችን በቀላሉ ለመለየት የሚያስችል መሆኑንም ተናግረዋል።

በተለይም ሀገራችን በኢኮኖሚ ልማት እያስመዘገበችው ያለውን እውነተኛ ገጽታ በግልጽ በማሳየት በውጭ ባለሀብቶች ዘንድ ትልቅ መተማመን እንዲፈጠር ያደርጋል ብለዋል።

የሀገራችን የኢንቨስትመንት መስህብነት ከፍ በማድረግ ተመራጭ መዳረሻ እንድትሆን ሰፊ በር የሚከፍት ከመሆኑም በላይ፣ አጠቃላይ የዕዳ ጫናን አቀናጅቶ በመቀነስ ረገድ የጎላ ድርሻ አለው።

የታክስ ሥርዓቱን በማዘመን እና የግብር መሰረቱን ለማስፋት በሚደረገው ጥረት ውስጥ ትልቅ ሚና ይጫወታል።