በአሳ አስጋሪነት ለተደራጁ ዜጎች የተደረገው ድጋፍ የወጣቶችን ተጠቃሚነት እያሳደገው ነው

🔇Unmute

ሰመራ ፤ሐምሌ 21/2018(ኢዜአ)፦በአፋር ክልል አፋምቦ ሐይቅ ላይ በአሳ አስጋሪነት ለተደራጁ ዜጎች የተደረገው ድጋፍ ተጠቃሚነታቸውን እያሳደገው መሆኑን በዘርፉ የተሰማሩ ወጣቶች ገለጹ።

የአፋር ክልል እንስሳትና ዓሳ ሃብት ቢሮ በአፋምቦ ወረዳ በአራት ማህበራት ለተደራጁ አሳ አስጋሪዎች የቁሳቁስ ድጋፍ በማድረግ ወደ ስራ ማስገባቱን ገልጿል።

ተደራጅተው ወደ ስራ ከገቡት መካከል ወጣት ኢብራሂም ሁመድ እንዳለው፤ የተደረገላቸው ድጋፍ በአካባቢያቸው ለረጅም ጊዜ ጥቅም ላይ ያልዋለውን የአሳ ሀብት አልምተው ተጠቃሚ ለመሆን አስችሏቸዋል።

ይህም በማህበር ተደራጅተው በመስራት ኢኮኖሚያዊ ተጠቃሚነታቸውን ለማሳደግ እንዳስቻላቸው ነው የጠቆመው።

የደማአሌ አሳ አስጋሪዎች ማህበር አባል የሆነው ወጣት አብዱ በዱል በበኩሉ፤በተደረገላቸው ድጋፍ የአሳ ምርትን ለሌሎች አካባቢዎች ማቅረብ እንዳስቻላቸው ነው የገለፀው።

የገበያ ትስስርም መመቻቸቱ ጠንክሮ በመስራት ለሌሎች አርአያ እንድንሆን ያግዛል ብሏል።

የክልሉ እንስሳትና ዓሳ ሀብት ልማት ቢሮ ኀላፊ አቶ ኢብራሂም መሐመድ እንደተናገሩት፤ በክልሉ ባሉ ስምንት የተፈጥሮና ሰው ሰራሽ ሐይቆች ወጣቶችን አደራጅቶ ወደ አሳ ልማት ስራ እንዲገቡ ተደርጓል።

ለአብነትም በአፋምቦ ሐይቅ ላይ 200 ወጣቶች በዓሳ ሀብት ልማት በመሰማራት ተጠቃሚ የሚሆኑበት አሰራር መዘርጋቱን አስረድተዋል።

የክልሉ ሕብረት ስራ ማኅበራት ማደራጃና ማስፋፊያ ኤጀንሲ ኀላፊ አቶ አብዱ ሐሰን ያዬ በበኩላቸው፤ በክልሉ ወጣቶችን በማደራጀት ወደ ስራ እንዲገቡ የማድረግ ተግባራት ትኩረት ተሰጥቷል ብለዋል።

ለዚህም ግብአትና ሙያዊ ስልጠና በመስጠት ገቢያቸውን ከማሳደግ ባለፈ ለህብረተሰቡ ጥራቱን የጠብቀ ምርት ማቅረብ እንዲችሉም አሰፈላጊው ድጋፍ መደረጉን ተናግረዋል ።