የክልሉን ሀብቶች ለይቶ በማልማት የህዝብን ተጠቃሚነት ለማሳደግ ወደ ተግባር ተገብቷል

🔇Unmute

ቡታጅራ ፤ ጥቅምት 11/2019 (ኢዜአ) ፦ በክልሉ ያሉ ሀብቶችን ለይቶ በማልማት እና የህዝብን አብሮነት በማጠናከር ተጠቃሚነትን ለማሳደግ ወደ ተግባር መገባቱን የማዕከላዊ ኢትዮጵያ ክልል ርዕሰ መስተዳድር የትምጌታ አስራት (ዶ/ር) ገለፁ።

"በመደመር መንግስት፣ የሕዝብ ድምፅ፣ የጋራ ተሳትፎ፣ የጋራ ልማት” በሚል መሪ ሀሳብ የተዘጋጀ ህዝባዊ የምክክር መድረክ በምስራቅ ጉራጌ ዞን ቡታጅራ ከተማ እየተካሄደ ነው።

ርዕሰ መስተዳድሩ በምክክር መድረኩ ላይ እንዳሉት የመደመር መንግስት የህዝቡን የሰላም፣ የልማትና የመልካም አስተዳደር ጥያቄዎች ፈጣን ምላሽ ለመስጠት የሚያስችል ውጥን ይዞ ወደ ተግባር ገብቷል።

ለእዚህም በክልሉ ያሉትን ሀብቶች ለይቶ በማልማትና የህዝብን አብሮነት በማጠናከር የጋራ ተጠቃሚነትን ለማሳደግ እንደሚሰራ ገልጸዋል።

በክልሉ ሰላምና ልማትን በዘላቂነት አጠናክሮ ለማስቀጠል ሀገር በቀል እውቀቶችን ከዘመናዊ አሰራር ጋር በማቀናጀት እንደሚሰራም ጠቁመዋል።

በክልሉ ያሉ የልማት ፀጋዎች ለይቶ ከማልማት በተጨማሪ የህዝቡን አብሮነት በማጎልበት ሁለንተናዊ ተጠቃሚነትን ለማረጋገጥ ተግባራዊ ሥራ መጀመሩንም አስታውቀዋል።

የማዕከላዊ ኢትዮጵያ ክልል የመንግስት ዋና ተጠሪ ዲላሞ ኦቶሬ (ዶ/ር) በበኩላቸው፣ በክልሉ የመደመር መንግስት እሳቤን ተግባራዊ በማድረግ የህዝቦችን አብሮነት ለማሳደግ እና ልማትና መልካም አስተዳደርን ለማስፈን እየተሰራ ነው።

ለዚህም የማህበረሰቡን ተሳትፎና ተጠቃሚነትን ማዕከል ያደረገ አሰራር መዘርጋቱንና ቴክኖሎጂን እውን ማድረግ መጀመሩን አንስተው፣ የምክክር መድረኩም ይህን ለማስቀጠል ያለመ ነው ብለዋል።

የምስራቅ ጉራጌ ዞን ዋና አስተዳዳሪ አቶ ደሱ አበጋዝ በበኩላቸው ፤ በዞኑ በግብርናው ዘርፍ ያሉ እድሎችንና ሌሎች የልማት አማራጮችን አሟጦ በመጠቀም የማህበረሰቡን ተጠቃሚነት ለማሳደግ እየተሰራ መሆኑ ጠቁመዋል።

በዞኑ ፈጣን ልማት በማረጋገጥ የማህበረሰቡን ተጠቃሚነት ለማሳደግ የተጀመሩ ስራዎችን ለማስቀጠል የምክክር መድረኩ ከፍተኛ አስተዋጽኦ እንደሚኖረውም ገልጸዋል።

በመርሐ ግብሩ ላይ የክልል፣ የዞን፣ የወረዳና የቡታጅራ ከተማ አስተዳደር ከፍተኛ አመራሮች እና የተለያዩ የማህበረሰብ ተወካዮች በመሳተፍ ላይ ናቸው።