ባሕር ዳር ከተማን የኢንቨስትመንትና የቱሪዝም ማዕከል ማድረግ የሚያስችሉ ተግባራት እየተከናወኑ ነው

🔇Unmute

ባሕር ዳር ፤ ታህሳስ 2/2018(ኢዜአ)፡- ባሕር ዳር ከተማን ተመራጭ የኢንቨስትመንትና የቱሪዝም መዳረሻ ማዕከል ማድረግ የሚያስችሉ የልማት ተግባራት እየተከናወኑ መሆኑን በምክትል ከንቲባ ማዕረግ የከተማ አስተዳደሩ የኢንዱስትሪና ኢንቨስትመንት መምሪያ ኃላፊ ወይዘሮ ብርሃን ንጉሴ ገለጹ።

‎የባሕር ዳር ከተማ አስተዳደርና የሰሜን ጎጃም ዞን ሰልጣኝ መካከለኛ አመራሮች በከተማዋ እየተከናወኑ የሚገኙ የልማት ስራዎችን እየጎበኙ ነው።

‎አመራሮቹ የኢንዱስትሪ መንደርን፣ የኮሪደር ልማት፣ የባሕር ዳር ዓለም አቀፍ ስታዲዮም፣ መሶብ የአንድ ማዕከል የአገልግሎት መስጫና ሌሎች የመሰረተ ልማት ስራዎችን ተዘዋውረው እንደሚጎበኙም ታውቋል።

የ‎መምሪያው ኃላፊ ወይዘሮ ብርሃን ንጉሴ በጉብኝቱ ወቅት እንዳሉት፤ ባሕር ዳርን ለነዋሪዎቿ ምቹና ፅዱ ከተማ ለማድረግ የተለያዩ የልማት ስራዎች እየተከናወኑ ይገኛሉ።

‎በተለይ በከተማ አስተዳደሩ 268 የተለያዩ ኢንዱስትሪዎች በስራ ላይ እንዳሉ ጠቅሰው፤ 108 ኢንዱስትሪዎች ደግሞ በግንባታ ላይ እንደሚገኙ ተናግረዋል።

‎እነዚህ ኢንዱስትሪዎች ተኪ ምርቶችን ከማምረት ባለፈ ለበርካታ ወገኖች የስራ ዕድል በመፍጠር የኢኮኖሚ ተጠቃሚነታቸውን በማረጋገጥ ሚናቸውን እየተወጡ ይገኛል ነው ያሉት።

‎እንዲሁም በመጀመሪያው ምዕራፍ የተገነባው የኮሪደር ልማት ከጣና ኃይቅ ጋር የሚያስተሳስሩ መንገዶች በመከፈታቸው የከተማዋ ውበት ይበልጥ የተገለጠበት መሆኑን ተናግረዋል።

‎እየተከናወኑ የሚገኙ የልማት ስራዎች ከተማዋ ተመራጭ የኢንቨስትመንትና የቱሪዝም መዳረሻ እንድትሆን እያስቻሉ መሆናቸውን አብራርተዋል።

‎በቀጣይም የተጀመሩ የልማት ስራዎችን በመደመር መንግስት እይታ በመቃኘት የከተማዋን ዕድገትና ልማት በማፋጠን የሕብረተሰቡን ሁለንተናዊ ተጠቃሚነት ለማረጋገጥ በትኩረት እንደሚሰራም አስታውቀዋል።