የጉምሩክ ኮሚሽን በተጠናቀቀው በጀት ዓመት ከ738 ቢሊዮን ብር በላይ ገቢ ሰበሰበ

🔇Unmute

አዲስ አበባ፤ ሐምሌ 2/ 2018(ኢዜአ):-የኢትዮጵያ ጉምሩክ ኮሚሽን በተጠናቀቀው የ2018 በጀት ዓመት 738 ነጥብ 14 ቢሊዮን ብር ገቢ መሰብሰቡን ኮሚሽነር ደበሌ ቃበታ (ዶ/ር) ገለፁ።

የኢትዮጵያ ጉምሩክ ኮሚሽን ኮሚሽነር ደበሌ ቃበታ (ዶ/ር) የተጠናቀቀውን የ2018 በጀት ዓመት ዕቅድ አፈጻጸም ክንውን በተመለከተ ለመገናኛ ብዙኃን መግለጫ ሰጥተዋል።

የኢትዮጵያ ጉምሩክ ኮሚሽን ኮሚሽነር ደበሌ ቃበታ (ዶ/ር) ለመገናኛ ብዙሃን በሰጡት መግለጫ፤ በበጀት ዓመቱ 725 ነጥብ 27 ቢሊዮን ብር ለማግኘት አቅዶ የተለያዩ ተግባራትን ሲያከናውን ቆይቷል ብለዋል።

በዚህም በተከናወኑ ውጤታማ ሥራዎች 738 ነጥብ 14 ቢሊዮን ብር ገቢ መሰብሰቡን አስታውቀዋል።

የተገኘው ገቢ ከአምናው ተመሳሳይ በጀት ዓመት ጋር ሲነጻጸር የ77 ነጥብ 56 በመቶ ብልጫ ያስመዘገበ እንደሆነ አመላክተዋል።

ኮሚሽኑ ሀገሪቱ ከቀረጥና ታክስ ተገቢውን ገቢ እንድታገኝ በማድረግ፣ የኮንትሮባንድና ህገ ወጥ የንግድ እንቅስቃሴን በመከላከልና በመቆጣጠር እንዲሁም የወጪ ንግድ እንዲሳለጥ የሚጠበቅበትን ሚና መወጣቱንም ጠቁመዋል።

የተሰበሰበው ገቢ ከወጪ ንግድ ቀረጥና ታክስ፣ በወጪ ንግድ ላይ ከሚስተዋል የኮንትሮባንድ እንቅስቃሴ እንዲሁም ከሌሎች ኮሚሽኑ ካከናወናቸው ተግባራት የተገኘ መሆኑን አብራርተዋል።

የመንግሥት የፖሊሲ አቅጣጫዎች ለዘርፉ የተመቹ መሆን፣ የተደረጉ ተቋማዊ የሪፎርም ሥራዎች እና አሠራርን በቴክኖሎጂ የማዘመን ተግባራት ለገቢው ማደግ አቅም መፍጠራቸውን ገልጸዋል።

የጉምሩክ ኮሚሽን በ2019 የበጀት ዓመት ከአንድ ትሪሊዮን ብር በላይ ገቢ ለመሰብሰብ ማቀዱንም አስታውቀዋል።

በተጠናቀቀው በጀት ዓመት ሕገወጥ የኮንትሮባንድ እንቅስቃሴዎችን የመቆጣጠር ሥራን በማጠናከር፥ ከዘርፉ ጥቅም ማስገኘት ያስቻሉ ውጤታማ ሥራዎች መሰራታቸውን አስገንዝበዋል።

በገቢና በወጪ እቃዎች ላይ በተሰራው የኮንትሮባንድ እንቅስቃሴዎችን የመከላከል ሥራም 28 ነጥብ 9 ቢሊዮን ብር የሚገመቱ ምርቶች መያዛቸውንም አብራርተዋል።

በኮንትሮባንድ እንቅስቃሴ ላይ በተደረገ ቁጥጥር ከተያዙ ምርቶች መካከል ኤሌክትሮኒክስ፣ መድሃኒት፣ አደንዛዥ እጽ፣ የቁም እንስሳት እና ሌሎች እንደሚገኙበት አመላክተዋል።

አሁንም በሀገር ኢኮኖሚ ላይ ላይ ከፍተኛ ተጽእኖ እያሳደረ ያለውን የኮንትሮባንድ እንቅስቃሴ ለመከላከልና ለመቆጣጠር የተጀመሩ ተግባራት ተጠናክረው እንደሚቀጥሉ ገልጸዋል።