በክልሉ የማዕድን ሀብት ልማት ለበርካታ ዜጎች የስራ እድል እየፈጠረና ከፍተኛ የገቢ አቅም እየሆነ ነው

🔇Unmute

ባህር ዳር፤ ሰኔ 2/2018(ኢዜአ)፦ በአማራ ክልል የማዕድን ሀብት ልማት ዘርፉ በጥናትና ምርምር በመታገዙ ለበርካታ ዜጎች የስራ እድል እየፈጠረና ከፍተኛ የገቢ አቅም እየሆነ መምጣቱን የክልሉ ማዕድን ሀብት ልማት ቢሮ ገለጸ።

ቢሮው በክልሉ ከሚገኙ ዩኒቨርሲቲዎች ጋር የሥነ ምድር ጥናትና ካርታ ስራ እንዲሁም የማዕድን ፍለጋና ክምችት ግመታ ጥናት የውል ፊርማ ስነ-ስርዓት አካሂዷል።

የቢሮ ኃላፊው ሀይሌ አበበ በመድረኩ እንደገለፁት፤ በክልሉ የማዕድን ሀብት ልማቱን በጥናትና ምርምር በማስደገፍ በተሰራ ስራ ለበርካታ ዜጎች የስራ እድል እየፈጠረና ከፍተኛ የገቢ አቅም እየሆነ ነው።

በዚህም በክልሉ የግራናይት፣ የማርብል፣ የጅብሰም፣ የወርቅ፣ የብረትና ሌሎች ማዕድናት በጥናት መለየታቸውን አብራርተዋል።

ዘርፉን በጥናትና ምርምር በመለየትና በማልማት ተኪ ምርቶችን በማምረት የውጭ ምንዛሬን ለማሳደግ መዋላቸውንም ገልፀዋል።ዘርፉ ለስራ ዕድል ፈጠራና ኢንቨስትመንቱ እንዲነቃቃ በማድረግ በኩል ተጨባጭ ለውጥ መመዝገቡን አመልክተዋል።

በቀጣይም የዘርፉን የመልማት አቅም በጥናትና ምርምር ውጤቶች ላይ በመመርኮዝ ወደ ላቀ ደረጃ ለማሳደግ በቅንጅት ይሰራል ነው ያሉት።

የጎንደር ዩኒቨርሲቲ የምርምርና ትብብር ምክትል ፕሬዚዳንት ተወካይ ውለታው መኩሪያ (ዶ/ር) በበኩላቸው እንደገለጹት፤ ዩኒቨርሲቲው የማዕድን ልማትን በምርምር እያገዘ ይገኛል።

በምርምር ላይ መሰረት ያደረገ የሃብት ፍለጋ ስራ በትብብር መከናወኑ ዘላቂ ዕድገትን ለማስመዝገብ ያስችላል ብለዋል።

የማዕድን ሃብት ልማት ስራው ምርምርና እውቀትን መሰረት ተደርጎ እየተሰራ መሆኑ የሚበረታታ መሆኑን የገለፁት ደግሞ የወሎ ዩኒቨርሲቲ የምርምርና ቴክኖሎጂ ሽግግር ምክትል ፕሬዚዳንት ሃዋ ወሌ (ዶ/ር) ናቸው።

በክልሉ ያሉትን የማዕድን ሀብቶች በእውቀት ለይቶ ለማልማት በሚደረገው ጥረት ዩኒቨርሲቲው በትብብር እየሰራ መሆኑን ጠቅሰዋል።

የውል ስምምነቱ የተካሄደው ከባህር ዳር፣ ጎንደር፣ ወልዲያ፣ ወሎ፣ ደብረ ብርሃን እና ደብረ ማርቆስ ዩኒቨርሲቲዎች ጋር ነው።