ሕዝብን ተጠቃሚ የሚያደርጉ ሁለንተናዊ የልማት ስራዎች ተጠናክረው ይቀጥላሉ

🔇Unmute

አርባምንጭ፣መስከረም 28/2019 (ኢዜአ)፦በደቡብ ኢትዮጵያ ክልል ሕዝብን ተጠቃሚ የሚያደርጉ ሁለንተናዊ የልማት ስራዎች ተጠናክረው እንደሚቀጥሉ የክልሉ ርዕሰ መስተዳድር ተስፋዬ በልጅጌ (ዶ/ር )ገለጹ፡፡

የክልሉ መንግሥት በፍትሐዊነት ላይ የተመሠረተ ማኅበራዊና ኢኮኖሚያዊ ልማትን የማረጋገጥ ስራውን አጥናክሮ ሊቀጥል እንደሚገባም የአርባ ምንጭ ከተማ ነዋሪዎች ተናግረዋል።

የደቡብ ኢትዮጵያ ክልል ርዕሰ መስተዳድር ዶክተር ተስፋዬ በልጅጌ (ዶ/ር) እና የክልሉ ከፍተኛ የመንግስት የስራ ኃላፊዎች ከአርባምንጭ ከተማ ነዋሪዎች ጋር ዛሬ ውይይት አድርገዋል።

ርዕሰ መስተዳድሩ በዚሁ ወቅት እንዳሉት መንግስት ትኩረት የሰጣቸው የኢኮኖሚ ምሶሶዎችን መሰረት በማድረግ የክልሉን ሕዝብ ተጠቃሚነት ለማሳደግ የሚያከናውናቸው ተግባራት ተጠናክረው ይቀጥላሉ።

በዋናነት የመስኖ አውታሮችን በመገንባትና በመካናይዜሽን የታገዘ የእርሻ ስራዎችን እንዲስፋፉ በማድረግ ግብርናውን ከዝናብ ጥገኝነት ለማላቀቅ በተቀናጀ መንገድ እንደሚሰራ ተናግረዋል።

ለኢኮኖሚው የጀርባ አጥንት የሆኑ መሠረተ ልማቶችን በመገንባትና ተደራሽ በማድረግም የህዝቡን የኑሮ ደረጃ ለማሻሻል የሚያስችሉ ስራዎች እንደሚከናወኑም ነው ያረጋገጡት።

የሰላም ግንባታን በማጠናከርም የህዝቡን አንድነትና አብሮነት በማጎልበት ክልሉ የሰላም ተምሳሌት እንዲሆን በላቀ ትጋት እንደሚሰራ ነው የጠቆሙት ።

የሌማት ትሩፋትን ጨምሮ በጠቅላይ ሚኒስትሩ የተጀመሩ ሰው ተኮር ፕሮጀክቶችን በማጠናከርም የምግብ ዋስትናን ለማረጋገጥና የስራ ዕድል ለመፍጠር በልዩ ትኩረት ይሰራል ብለዋል።

የአርባ ምንጭ ከተማ ነዋሪዎች በበኩላቸው የክልሉ መንግሥት በፍትሐዊነት ላይ የተመሠረተ ማኅበራዊና ኢኮኖሚያዊ ልማትን የማረጋገጥ ስራውን አጠናክሮ ሊቀጥል እንደሚገባም ነው ያመለከቱት።

በክልሉ ዘላቂ ሰላም እንዲሰፍን የሰላም እሴቶችን በመገንባት፣ አንድነትና አብሮነትን በማስቀጠልም ለሀገር ግንባታ ማዋል እንደሚጠበቅበት ነው የጠቀሱት።

በተጨማሪም መንግስት የአርባምንጭ ዓለም አቀፍ ስታዲየምን ጨምሮ በሁሉም አካባቢዎች የተጀመሩ የኮሪደር እና የወንዝ ዳርቻ ልማቶች አጠናክሮ በመቀጠል ተጠቃሚነታችንን ሊያጠናክር ይገባዋል ብለዋል።

የመንገድ፣ የኤሌክትሪክ እና የዲጂታል መሠረተ ልማቶችን በማስፋፋትም የከተሞችንና የገጠር ትራንስፎርሜሽን ለማፋጠን የሚከናወኑ ተግባራትም የተሻለ ትኩረት ሊሰጣቸው እንደሚገባ አስረድተዋል።

የትምህርት፣ የጤና እና ሌሎች ማሕበራዊ አገልግሎት መስጫ ተቋማትን በማጠናከር የዜጎችን ተጠቃሚነት ለማረጋገጥ የተጀመሩ የልማት ፕሮጀክቶች በልዩ ትኩረት እንደሚከናወኑም ያላቸውን ተስፋ ተናግረዋል።

በመድረኩ የመንግስት የስራ ኃላፊዎች፣ የሀገር ሽማግሌዎች፣ የሃይማኖት አባቶች፣ ወጣቶች፣ ሴቶች፣ ምሁራንና ሌሎች የማህበረሰብ ክፍሎች ተሳትፈዋል።