የግብርና ሚኒስትሩ በግብርና ስራዎች ትብብር ዙሪያ ከብራዚል አምባሳደር ጋር ተወያዩ

አዲስ አበባ ፤ መጋቢት 9/2017 (ኢዜአ)፦ የግብርና ሚኒስትር ግርማ አመንቴ (ዶ/ር) በኢትዮጵያ የብራዚል አምባሳደር ጃንዲር ፌሬራ ዶስ ሳንቶስ ጋር ተወያይተዋል።

ውይይቱ ሁለቱ ሀገራት በግብርና ልማት ያላቸውን ትብብር ማጠናከር ላይ ያተኮረ ነው።

በዚህም የአፈር ለምነትና ጤንነት አጠባበቅ፣ በግብርና ሜካናይዜሽን እና በግብርና ወጪ ንግድ ስራዎች በጋራ ለመስራት ተስማምተዋል።

ኢትዮጵያ የ “ግሎባል አሊያንስ አጌነስት ሀንገር እና ፖቨሪቲ” የሀገራት ቦርድ እና የብሪክስ ፕላስ (BRICS +) አባል መሆኗ ሀገራቱ በግብርናው ዘርፍ ያላቸውን ትብብር ለማጠናከር ምቹ ሁኔታ እንደሚፈጥር የሚኒስቴሩ መረጃ ያመለክታል።