በክልሉ ፍትሃዊ የህዝብ ተጠቃሚነትን የማረጋገጥ ጥረት ተጠናክሮ ይቀጥላል 

🔇Unmute

ባህር ዳር፤ ጥር 8/2018 (ኢዜአ)፡- በአማራ ክልል በከተሞችም ይሁን በገጠር የልማት ተደራሽነትን በማስፋት ፍትሃዊ የህዝብ ተጠቃሚነትን የማረጋገጥ ጥረት ተጠናክሮ የሚቀጥል መሆኑን በምክትል ርዕሰ መስተዳድር ማዕረግ የክልሉ ከተማ ልማት ዘርፍ አስተባባሪ አሕመዲን መሀመድ (ዶ/ር) ገለጹ።

በምክትል ርዕሰ መስተዳድር ማዕረግ የክልሉ ከተማ ልማት ዘርፍ አስተባባሪ አሕመዲን መሀመድ (ዶ/ር) ለኢዜአ እንደገለጹት፤በክልሉ በሁሉም አካባቢዎች የልማት ተደራሽነትን በማስፋት ፍትሃዊ ተጠቃሚነትን የማረጋገጥና የጋራ ብልጽግናን እውን የማድረግ ጥረት ተጠናክሮ ቀጥሏል።

ከከተሞች በተጨማሪ ለገጠር አካባቢዎችም ተመሳሳይ ትኩረት በማድረግ የህብረተሰቡን የአኗኗር ዘይቤ ለመቀየር የተቀናጀ ጥረት እየተደረገ ይገኛል ብለዋል።

ለዚህ የልማት እቅድ መሳካትም ከመንግስት ጥረት በተጨማሪ ባለሃብቶች፣ አጋር ተቋማትና አጠቃላይ የህብረተሰቡ ትብብርና ድጋፍ ወሳኝ መሆኑን አንስተዋል።

የክልሉ መንገድ፣ ትራንስፖርትና ሎጅስቲክስ ቢሮ ሃላፊ ጋሻው አወቀ (ዶ/ር)፤ የገጠር ልማትን ለማሳካትና የመንገድ ተደራሽነትን ለማስፋት የተቀናጀ ጥረት እየተደረገ መሆኑን ገልጸዋል።

በክልሉ ዘመናዊና ስማርት ከተሞችን እውን የማድረግ እና የገጠር ቀበሌዎችን በመንገድ በማስተሳሰርና የገጠር ኮሪደር ልማትን ለማሳካት የሚያስችል ዝግጅት እየተደረገ ስለመሆኑም አንስተዋል።

በዚህም በክልሉ እስካሁን ከ2 ሺህ 664 በላይ የገጠር ቀበሌዎችን በመንገድ ማስተሳሰር መቻሉን ተናግረዋል።

በቀጣይም በገጠር ከመንገድ መሰረተ ልማት ባሻገር ሌሎች ተያያዥ መሰረተ ልማቶች የሚከናወኑ መሆኑን አንስተው የኮሪደር ልማቱ በተመረጡ አካባቢዎች በመጀመር የሚሰፋ ይሆናል ብለዋል።