የኢትዮጵያ ፋይናንስ ፎረም ትልልቅ የኢኮኖሚ ውሳኔዎችና አዳዲስ አሰራሮች የሚመላከቱበት መድረክ ነው

🔇Unmute

አዲስ አበባ ፤ መስከረም 19/2019 (ኢዜአ) ፦ የኢትዮጵያ ፋይናንስ ፎረም ትልልቅ የኢኮኖሚና ፋይናንስ ጉዳዮች የሚዳሰሱበትና አዳዲስ አሰራሮች ይፋ የሚደረጉበት አህጉራዊ ተጽዕኖ ያለው ጉባዔ እየሆነ መምጣቱን የኢትዮጵያ የብሔራዊ ባንክ ገዢ ኢዮብ ተካልኝ (ዶ/ር) ገለጹ፡፡

ሁለተኛው የኢትዮጵያ ፋይናንስ ፎረም 2026 በዐድዋ ድል መታሰቢያ መካሄድ ጀምሯል፡፡

የብሔራዊ ባንክ ገዢ ኢዮብ ተካልኝ (ዶ/ር) በኢኮኖሚውና በፋይናንስ ዘርፉ የተወሰዱ ወሳኝ የፖሊሲ እርምጃዎችን፣ የውጭ ምንዛሬ ማሻሻያዎችን፣ የባንኮችን እንቅስቃሴ እንዲሁም የዋጋ ግሽበትንና ሀገራዊ ግቦችን በተመለከተ ጋዜጣዊ መግለጫ ሰጥተዋል፡፡

በመግለጫቸውም የኢትዮጵያ ፋይናንስ ፎረም በየዓመቱ በጉጉት የሚጠበቅ፣ ትልልቅ የኢኮኖሚና ፋይናንስ ጉዳዮች የሚዳሰሱበትና አዳዲስ አሰራሮች ይፋ የሚደረጉበት አህጉራዊ ተጽዕኖ ያለው ጉባዔ እየሆነ መምጣቱን ተናግረዋል፡፡

የሶስተኛውን ዙር የፋይናንስ ተደራሽነት ስትራቴጂ ይፋ መደረጉን ጠቅሰው፤ የሀገሪቷ ን የክፍያ ስርዓት ከአፍሪካ አህጉራዊ የክፍያ ስርዓት (PAPSS) ጋር የማገናኘት ስራ እንደሚሰራም ተናግረዋል፡፡

የብሔራዊ ባንክ ተቀዳሚና ዋና ተግባር የዋጋ መረጋጋትን እንዲሰፍን ማድረግ መሆኑን ያረጋገጡት ገዢው፤ የዋጋ ግሽበት ለመቀነስ የሚከናወኑ ተግባራት ተጠናክረው እንደሚቀጥሉም ተናግረዋል።

የዋጋ መረጋጋትን መፍጠርና የዋጋ ግሽበትን መቆጣጣር የዜጎችን የኑሮ ሁኔታ ማሻሻል አንዱ ጉዳይ መሆኑን ጠቅሰው፤ የዚህ ውጤት የሚለካው በዜጎች የገቢ እድገት፣ እንዲሁም እንደ ምግብና የቤት ኪራይ ባሉ መሰረታዊ አቅርቦቶች ዋጋ መቀነስ መሆኑን አስረድተዋል።

በአጭር ጊዜ ውስጥ የተገኘውን የውጭ ምንዛሬ ማሻሻያ ስኬት በሚመለከት፣ ሌሎች ሀገራት በ10 ዓመታት ያሳኩትን ውጤት ኢትዮጵያ በአጭር ጊዜ ውስጥ ለማሳካት እየሰራች መሆኗን ገልጸዋል።

የብሔራዊ ባንክ ዋና ዓላማ በኦፊሴላዊው እና በጥቁር ገበያው መካከል ያለው ልዩነት ጠቦ አንድ ገበያ (Converge) እንዲፈጠር ማድረግ መሆኑን ተናግረዋል።

በሌላ በኩል ባንኮች እርስ በእርሳቸው የውጭ ምንዛሬ መበዳደርና መነጋገር የሚያስችላቸው የኢንተር ባንክ ኤፍ ኤክስ ማርኬት ስርዓት መጀመሩንም ተናግረዋል፡፡

በሌላ በኩል ከኢንፎርሜሽን መረብ ደህንነት አስተዳደር (INSA) ጋር በመተባበር በህገ-ወጥ የውጭ ምንዛሪ ግብይት ላይ ቁጥጥር የሚያደርግ የተደራጀ ስርዓት እየተዘረጋ መሆኑን አመልክተው፤ ብሔራዊ ባንክ ከሶስት ቢሊዮን ዶላር በላይ ለጨረታ ማቅረቡንና ይህን አቅርቦቱን አጠናክሮ እንደሚቀጥል አስታውቀዋል።