ካፒታል ገበያን የሁሉም ለሁሉም ለማድረግ በትኩረት ይሰራል - ሀና ተኸልኩ

አዲስ አበባ፤ ጥር 3/2017(ኢዜአ)፦ ተአማኒነት ያለው፣ ሁሉን አሳታፊ እና የኢኮኖሚ ተጠቃሚነትን የሚፈጥር የካፒታል ገበያ ለመገንባት በትኩረት እንደሚሰራ የኢትዮጵያ ካፒታል ገበያ ባለስልጣን ዋና ዳይሬክተር ሀና ተኸልኩ ገለጹ።

ጠቅላይ ሚኒስትር ዐቢይ አሕመድ(ዶ/ር) የኢትዮጵያ የሰነደ ሙዓለ ንዋዮች ገበያን ትናንት በይፋ አስጀምረዋል።

በማስጀመሪያ መርሃ ግብሩ ላይም የፓናል ውይይት ተካሂዷል።

በፓናሉ ላይ የተገኙት የኢትዮጵያ ካፒታል ገበያ ባለስልጣን ዋና ዳይሬክተር ሀና ተኸልኩ ከዚህ ቀደም ለበርካታ ዓመታት የካፒታል ገበያ የሚመስሉ እንቅስቃሴዎች እንደነበሩ ገልጸዋል።

ባለፉት ዓመታት ከመንግስት የፖሊሲ አቅጣጫዎች፣ ከሀገር በቀል ኢኮኖሚ ሪፎርም እና ከአጠቃላይ የኢኮኖሚ ማሻሻያ ማዕቀፎች በመነሳት የካፒታል ገበያ የማደራጀት ስራ ሲከናወን መቆየቱን አመልክተዋል።

በዚህም ትልቅ ትኩረት ግልጽ የሆነ የካፒታል ገበያን የሚመራና የሚቆጣጣር የህግ ማዕቀፍ ማዘጋጀት እንደነበር ጠቅሰው የካፒታል ገበያ አዋጅ ቁጥር 1248 ጸድቆ ወደ ስራ መገባቱን ተናግረዋል።

የህግ ማዕቀፉ የኢትዮጵያ ካፒታል ገበያ ባለስልጣን፣ የኢትዮጵያ የሰነደ ሙዓለ ንዋዮች ገበያ እና ገበያውን የሚያገናኙ ተቋማት እንዲተዋወቁ ማድረጉ ነው ዋና ዳይሬክተሯ የገለጹት።

አዋጁ ገበያውን ለማቀላጠፍ የሚያመቹ ተቋማት እና ቴክኖሎጂዎች እንዲፈጠሩ የሚያስችል የአሰራር ማዕቀፍ መዘርጋቱን አመልክተዋል።

በተለይም በኢንቨስትሮች መካከል በአካል ይደረግ የነበረውን የሙዓለ ሰነዶች ግብይት በቴክኖሎጂ እንዲሆን ማድረግ መቻሉን ለአብነት ጠቅሰዋል።

አዋጁን ተከትለው የወጡ መመሪያዎች ኢንቨስተሮችን ይጎዱ የነበሩ ችግሮች ለመቅረፍ እና ለውሳኔ የሚያግዛቸውን በቂ እና ጥራታቸውን የጠበቁ መረጃዎች እንዲያገኙ የሚያስችል የአሰራር ማዕቀፍ መፈጠሩን አስረድተዋል።

ባለስልጣኑ በዋናነት የኢንቨስትመንት ጥበቃ ትኩረት አድርጎ እንደሚሰራ ነው ያነሱት።

በተጨማሪም ስለ ካፒታል ገበያ ለባለድርሻ አካላት ሰፊ የግንዛቤ የመፍጠር እና የማስተማር ስራ መከናወኑን ነው የገለጹት።

እንደ ዋና ዳይሬክተሯ ገለጻ፤ የኢትዮጵያ ካፒታል ገበያ ባለስልጣን በቀጣይ በሙዓለ ሰነድ አቅራቢ ዋና ኢንቨስተሩ የሚታመን የካፒታል ገበያ ለመገንባት በትኩረት ይሰራል።

በካፒታል ገበያው የባለድርሻ አካላት የነቃ ተሳትፎ እንዲኖር፣ በርካታ ምርቶች እና አገልግሎቶች ለገበያው እንዲቀርቡ እና ሁሉን አሳታፊ ለማድረግ እንደሚሰራ አመልክተዋል።

ካፒታል ገበያ የሁሉም ለሁሉም ነው ያሉት ዋና ዳይሬክተሯ አነስተኛና መካከለኛ ኢንተርፕራይዞች እና የግሉ ዘርፍን ጨምሮ ሁሉም ሰው እንዲሳተፍ የሚያስችሉ አሰራሮች መኖራቸውን አንስተዋል።

በአጠቃላይ የካፒታል ገበያ የኢትዮጵያን ጥቅል ኢኮኖሚ የሚደገፍ እና የዜጎችን ህይወት የሚቀይር ዘርፍ እንዲሆን በትኩረት ይሰራል ብለዋል።

የኢትዮጵያ የሰነደ ሙዓለ ንዋዮች ገበያ የተለያዩ የንግድ አይነቶችን ታሳቢ በማድረግ ሶስት ልዩ ልዩ የገበያ አይነቶችን የሚያቀርብ ነው።

እነርሱም የአክሲዮን ገበያ፣ የዕዳ ሰነድ ገበያ እና የአማራጭ ገበያ ናቸው።