በአዲስ አበባ የኮሪደር ልማትን ጨምሮ እየተከናወኑ የሚገኙ የልማት ሥራዎች የከተማዋን ተወዳዳሪነት በእጅጉ የሚያጎሉ ናቸው

አዲስ አበባ፤ሚያዚያ 15/2017 (ኢዜአ)፦በአዲስ አበባ የኮሪደር ልማትን ጨምሮ እየተከናወኑ የሚገኙ ዘርፈ ብዙ የልማት ሥራዎች የከተማዋን ዓለም አቀፍ ተወዳዳሪነት በእጅጉ የሚያሳድጉ መሆናቸው ተገለጸ፡፡

የፕሮጀክቶች በፍጥነትና በጥራት መጠናቀቅ የመፈጸም አቅምን ከፍ ያደረገ ስለመሆኑም ተጠቁሟል፡፡

ጠቅላይ ሚኒስትር ዐቢይ አሕመድ (ዶ/ር) በትናንትናው ዕለት የካዛንችስ የኮሪደር ልማት ስራን መመረቃቸው ይታወቃል፡፡

ጠቅላይ ሚኒስትሩ በማህበራዊ ትስስር ገጻቸው ባሰፈሩት መልዕክት የከተሞቻችንን የማዘመን ሰፊ ጥረት አይነተኛ ማሳያ የሆነውን በካዛንቺስ ያለውን የኮሪደር ልማት ክፍል በይፋ መርቀናል ብለዋል፡፡

የጠቅላይ ሚኒስትር ጽሕፈት ቤት ተጠሪ ተቋማት እና የብልፅግና ፓርቲ ጽሕፈት ቤት የሥራ ኃላፊዎች እና ሠራተኞች በከተማዋ የተለያዩ አካባቢዎች በመዘዋወር የካሳንቺስ የኮሪደር ልማት ስራዎችን፣ የመልሶ ማልማት፣ የእንስሳት ልማትና ልህቀት ማዕከል፣ አዲስ ዓለም አቀፍ ኮንቬንሽን ማዕከልና ጨምሮ ሌሎች የልማት ፕሮጀክቶችን ጎብኝተዋል።

በዚሁ ወቅት በሰጡት አስተያየትም የልማት ስራዎቹ የከተማዋን ዕድገት የሚያፋጥኑና የሕዝቡን ተጠቃሚነት የሚያሳድጉ መሆናቸውን አንስተዋል፡፡

በጉብኝቱ ላይ ከብሔራዊ ቤተ-መንግሥት የተሳተፉት አስቴር ምንውየለት የኮሪደር ልማት ስራዎች በፍጥነት፣ በጥራትና ሁሉንም የመሠረተ ልማቶች ባሟሉ መልኩ መከናወናቸውን ተናግረዋል፡፡

የካዛንቺስ የኮሪደር ልማት ስራዎች ደረጃቸውን የጠበቁ የተሽከርካሪ፣ የእግረኛና የብስክሌት መንገዶች እንዲሁም የተቀናጀ የመሠረተ ልማትን ጨምሮ ሌሎችንም ባካተተ መልኩ የተገነባ ማራኪ መሆኑን ተናግረዋል፡፡

ከአፍሪካ ልህቀት አመራር አካዳሚ የተሳተፉት አለሙ ገላን በበኩላቸው ለልማት ተነሺዎች ሁሉንም ዓይነት የመሠረተ ልማት ያሟላ የመኖሪያ ቤት ጨምሮ ለኑሮ ምቹ የሆነ ከባቢ መሰጠቱ ልማቱ ህዝቡን ተጠቃሚ እያደረገ ለመሆኑ ማሳያ ነው ብለዋል፡፡

ከኢትዮጵያ ኢንቨስትመንት ኮሚሽን የተሳተፉት ሐረግ ታደሠ እንዳሉትም፤ በአዲስ አበባ እየተከናወኑ የሚገኙ ስራዎች የስራ ባህልን በመቀየር ላይ የሚገኙ እና የገጽታ ግንባታን በማሳደግ ላይ እንደሚገኙም ገልጸዋል፡፡

ከአፍሪካ ልህቀት አመራር አካዳሚ ብሩክ አመንቴ በበኩላቸው፥ አዲስ አበባ ለሌሎች ከተሞች ሞዴል መሆን ወደ ምትችልበት ደረጃ እየተሸጋገረች መሆኗን አንስተዋል፡፡

አዲስ አበባ በከፍተኛ የለውጥ ሂደት ላይ እንደምትገኝ የተጠናቀቁና በመጠናቀቅ ላይ የሚገኙ የልማት ስራዎች ማሳያ ናቸው ብለዋል፡፡

ከጠቅላይ ሚኒስትር ጽህፈት ቤት የጉብኝቱ ተሳታፊ ሙሉነህ ንጉሴ በሰጡት ሃሳብም፥ የፕሮጀክቶች በፍጥነትና ጥራት መጠናቀቅ ባህል እየሆነ መምጣቱን እንደሚያሳይ ተናግረዋል።

በአዲስ አበባ እየተከናወኑ የሚገኙ የልማት ስራዎች የሕብረተሰቡን ተጠቃሚነት ያረጋገጡና የስራ ባህልን የቀየሩ መሆናቸውንም ጠቅሰዋል፡፡