<p>የስንዴ ልማት ስራዎችን ለማስፋት መንግስት በትኩረት እየሰራ ነው - ርዕሰ መስተዳድር አወል አርባ</p>

አዲስ አበባ፤ የካቲት 20/2017(ኢዜአ)፦ የስንዴ ልማት ስራዎችን ለማስፋት መንግስት በትኩረት እየሰራ ነው ሲሉ የአፋር ክልል ርዕሰ መስተዳድር አወል አርባ ገለፁ።

ርዕሰ መስተዳድር አወል አርባ በአፋር ምርጥ ዘር ኢንተርፕራይዝ ዱብቲ ላይ እየለማ የሚገኘውን የስንዴ ልማት ጎብኝተዋል።

በዚህ ወቅት በክልሉ የተጀመረውን የስንዴ ልማት ስራዎች ለማስፋት መንግስት በትኩረት እየሰራ እንደሆነ መናገራቸውን የክልሉ ኮሙኒኬሽን መረጃ ያመላክታል።

የአፋር ምርጥ ዘር ኢንተርፕራይዝ የስንዴ ዘር በበቂ ሆኔታ እንዲኖር እየሰራ ያለው ስራ አበረታች መሆኑንም ርዕሰ መስተዳድሩ ጨምረው ገልጸዋል።

አፋርን በስንዴ ልማት ቀዳሚ ለማድረግ እየተሰራ መሆኑን ጠቁመው ባለ ሀብቶችን በማሳተፍ የስንዴ ልማት ስራዎች ተጠናክረው እንዲቀጥሉ እየተሰራ መሆኑን አረጋግጠዋል።