ቢሮው የመዲናዋን የሰላም እና ፀጥታ ጉዳዮች በተመለከተ ከነዋሪዎች ጥሪ መቀበል የሚያስችል የጥሪ ማዕከል ስራ አስጀመረ

አዲስ አበባ፤ መጋቢት 4/2017(ኢዜአ)፡- የአዲስ አበባ ከተማ ሰላምና ጸጥታ አስተዳደር ቢሮ የመዲናዋን የሰላም እና ፀጥታ ጉዳዮች በተመለከተ ከነዋሪዎች ጥሪ መቀበል የሚያስችል የጥሪ ማዕከልን ጨምሮ የተለያዩ 10 ቴክኖሎጂዎችን ይፋ አደርጓል።

ፀጥታን የተመለከቱ ጥቆማና ቅሬታ፣ በማንኛውም የከተማዋ የሰላምና ፀጥታ ጉዳዮች ዙሪያ እና በቢሮው አገልግሎት አሰጣጥ ላይ መረጃ መስጠት የሚያስችሉ የተለያዩ ቴክኖሎጂዎችን ነው ቢሮው ዛሬ ይፋ ያደረገው።

በዚህም ቢሮው 8882 የነፃ የስልክ ጥሪ ማዕከል፣ የድረ ገጽ፣ የዜጎች ተሳትፎ መተግበሪያ፣ አሴት ማኔጅመንት፣ ቪዲዮ ኮንፍረንስን ጨምሮ ሌሎች የቴክኖሎጂ ስራዎችን ይፋ አድርጓል።

ቢሮው የሚሰጣቸውን አገልግሎቶች ፈጣን፣ ቀልጣፋና ለህብረተሰቡ ተደራሽ ለማድረግ ያለማቸውን የቴክኖሎጂ ውጤቶች ለማስተዋወቅና ለማስጀመር የተዘጋጀ መርሐ ግብር እየተካሄደ ነው።

የአዲስ አበባ ከተማ ሰላምና ጸጥታ አስተዳደር ቢሮ ኃላፊ ሊዲያ ግርማ በቢሮው የለሙትን ቴክኖሎጂዎች ይፋ ባደረጉበት ወቅት እንዳሉት ባለፉት ዓመታት ህዝቡን በማሳተፍ በተሰሩ ስራዎች የከተማዋን ሰላም ዘላቂ ማድረግ ተችሏል።