በአስተዳደሩ የሕብረተሰቡን የመሠረተ ልማት ጥያቄዎች በላቀ ደረጃ የመፍታት ሂደቱ ተጠናክሮ ቀጥሏል

🔇Unmute

ድሬደዋ፤ መስከረም 13/2018 (ኢዜአ)፦ በድሬዳዋ አስተዳደር የከተማና የገጠሩን ሕብረተሰብ የመሠረተ ልማት ጥያቄዎች በላቀ ደረጃ የመፍታት ሂደቱ ተጠናክሮ መቀጠሉን የአስተዳደሩ ከንቲባ ከድር ጁሃር ገለጹ።

የድሬደዋ ከተማን ሁለንተናዊ ልማትና ዕድገት የሚያሳልጥ የ4 ነጥብ 2 ኪሎ ሜትር የአስፋልት መንገድ ግንባታ ተጠናቆ ለትራፊክ ክፍት ሆነ።

የአስፋልት መንገዱን መርቀው አገልግሎት ያስጀመሩት የድሬዳዋ አስተዳደር ከንቲባ ከድር ጁሃር፤ የድሬዳዋ ምክር ቤት አፈ ጉባኤ አቶ አብዲ ሙክታር እና ሌሎች ከፍተኛ አመራሮች ናቸው።

የአስተዳደሩ ከንቲባ አቶ ከድር ጁሃር በምረቃው ወቅት እንዳሉት፤ የከተማና የገጠሩን ሕብረተሰብ የመሠረተ ልማት ጥያቄዎች በላቀ ደረጃ የመፍታት ሂደቱ ተጠናክሮ ቀጥሏል።

በከተማው ወረዳ ዘጠኝ የተገነባው ደረጃውን የጠበቀ የአስፋልት መንገድ ከጅቡቲ የወጪና የገቢ ንግድ ዕቃዎች ከሚመላለሱበት የክፍያ መንገድ ጋር የሚያገናኝ በመሆኑ ጠቀሜታውን የጎላ ያደርገዋል።

የመደመር መንግሥት ምቹ የመኖሪያና የሥራ አካባቢ ለመፍጠር እያከናወናቸው ከሚገኙት ፕሮጀክቶች መካከል አንዱ ዛሬ ተመርቆ ለአገልግሎት የበቃው የዘመናዊ አስፋልት መንገድ መሆኑንም ከንቲባው ተናግረዋል።

ባለፉት አምስት ዓመታት ከ22 ኪሎ ሜትር በላይ የዘመናዊ አስፋልት መንገድ ግንባታ እና ከኮሪደር ልማት ጋር የተሰናሰሉ አዳዲስ የመኪናና የእግረኛ መንገዶች ተገንብተው ለአገልግሎት መብቃታቸውን ገልጸዋል።

በዚህም የመሠረተ ልማት አውታሮችን በማስፋፋትና ለኑሮ ምቹ የሆኑ አካባቢዎችን ከመፍጠር ባለፈ የሕዝቡን ጥያቄዎች ደረጃ በደረጃ የመፍታት ሂደቱ መጠናከሩን አመልክተዋል።

የድሬዳዋ ከተማ ሥራ አስኪያጅ ኢንጂነር ጀማል ኢብራሂም በበኩላቸው፣ የከተማዋ ዳርቻ አካባቢ ነዋሪዎችን የዘመናት የመንገድ ጥያቄ ለመመለስ የተደረገው ዘርፈ ብዙ ርብርብ አዎንታዊ ምላሽ ማግኘቱን ገልጸዋል።

መንገዱ የወረዳው ነዋሪዎችን ብቻ ሳይሆን የከተማዋን ማኅበራዊና ኢኮኖሚያዊ ሁለንተናዊ እንቅስቃሴዎች በላቀ ደረጃ እንደሚያሳድግም ሥራ አስኪያጁ ተናግረዋል።

መንገዱ ለአገልግሎት ክፍት መሆኑ መንግሥት የዜጎችን ጥያቄዎች ለመፍታት ያሳየውን ቁርጠኝነት የተመለከትንበት ነው ያሉት ደግሞ የወረዳው ነዋሪ ወይዘሮ ፋጡማ አብዲ ናቸው።

አቶ ሰሎሞን አሰፋ የተባሉ ነዋሪ በበኩላቸው፣ መንገዱ በይፋ አገልግሎት መጀመሩ የድሬዳዋ አስተዳደር አመራሮች ለነዋሪው የመልካም አስተዳደር ጥያቄዎችን ለመፍታት ያላቸውን ቁርጠኝነት ያሳያል ብለዋል።